2026-cı ildə F2-də debüt mövsümündəki təsirli performansı ilə diqqət çəkən gənc istedad bu ayın sonunda İmolada keçiriləcək Köhnə Bolidlərin Testi (TPC) çərçivəsində ötənilki VCARB02-nin sükanı arxasına keçəcək. Komanda həmin tarixdə mövsümün son çəkiliş gününü də keçirəcək.
Tədbir çərçivəsində komandanın hazırkı pilotları Liam Louson və Arvid Lindblad bu mövsümün bolidi ilə məhdud məsafə qət edəcəklər. Tsolov isə ötənilki bolidlə geniş test proqramı həyata keçirəcək.
Bu test gənc istedadı F1 bolidi ilə tanış etməkdən daha böyük əhəmiyyət daşıyır. Ötən il Formula 3 çempionatını ikinci pillədə başa vuraraq 25 superlisenziya xalı qazanan Tsolov bu il F2 mövsümünü ilk beşlikdə başa vurarsa, superlisenziya üçün tələb olunan xal həddini keçdiyini rəsmiləşdirəcək.
Lakin F1-də sərbəst yürüş sesiyalarında trasa çıxa bilməsi üçün əvvəlcə F1 bolidi ilə kifayət qədər məsafə qət etməlidir.
Racing Bulls-un baş direktoru Peter Bayer ötən ay Sky F1-ə açıqlamasında bu planın siqnallarını verərək belə demişdi: “Hazırda onun üçün TPC testi keçirməyi nəzərdən keçiririk. Çünki cümə məşqlərində bolidi idarə edə bilməsi üçün lisenziyaya ehtiyacı var.
“Qət etməli olduğu hələ bir neçə kilometrlik məsafə qalıb və bunu payız dövrü üçün planlaşdırırıq”.
Daha əvvəl Red Bull-un RB7 və RB8 kimi əfsanəvi bolidləri ilə nümayiş yürüşləri keçirən Tsolov İmoladakı bu sürüşlə ilk dəfə müasir F1 komandası ilə rəsmi test şəraitində çalışma imkanı əldə edəcək.
Bolqar pilotun adı son vaxtlar Racing Bulls ilə tez-tez hallanır və hətta 2027-ci il üçün ona yer vəd edildiyi barədə iddialar ortaya çıxıb. Lakin komandanın baş direktoru Peter Bayer bu söz-söhbətləri qəti şəkildə təkzib edib: “Bunlar tamamilə şayiələrdən ibarətdir. Nikola əla iş görür və əlbəttə ki, radarımızda olan çox böyük istedaddır.
Ancaq hələ çox erkəndir. Liam və Arvid də ən azı onun qədər parlaq iş görürlər. Buna görə də hazırda 2027-ci il üçün yer ümumiyyətlə gündəmimizdə deyil”.
Gələcəyi ilə bağlı hələ konkret təminat almadığını qəbul edən 19 yaşlı Tsolov isə özünəinamını və hədəflərini belə ifadə edib: “İnsan həmişə gördüyü işdə ən yaxşı olduğuna inanmaq istəyir. Mən də bu il bunu göstərməyə çalışıram. İndiyə qədər etdiklərimi düşündükdə, mənə fürsət verildiyi təqdirdə F1-ə çox yaxşı uyğunlaşa biləcəyimə inanıram. Həmin fürsəti əldə etmək üçün əlimdən gələnin ən yaxşısını edəcəyimi bilirəm və ümumilikdə özümə güvənirəm”.
Şərh əlavə et