Sürücülər sessiyanın əvvəlində bokslarda gözləməyə üstünlük verməyərək, 30 dəqiqəlik sıralanma turu başlayan kimi trasa çıxıblar.
İlk istinad vaxtını Yamakoşi müəyyənləşdirib – yaponiyalı sürücü dövrəni 1:22.204 nəticə ilə başa vurub. Lakin az sonra Tuukka Taponen onu cəmi 0.002 saniyə qabaqlayıb.
Noa Strømsted hər iki sürücüdən 0.1 saniyə sürətli olub, lakin ikinci sürətli dövrəsində Taponen yenidən liderliyi ələ keçirərək 1:21.775 nəticə göstərib. Sessiya ərzində tras hüdudlarından kənara çıxan sürücülərin dövrə vaxtları ləğv olunub.
Sürücülərin əksəriyyəti ikinci cəhd üçün sessiyanın bitməsinə 10 dəqiqə qalmış trasa çıxsa da, Yamakoşi bunu bir neçə dəqiqə əvvəl edib. Boş trasdan maksimum yararlanan yaponiyalı sürücü 1:21.730 nəticə ilə yenidən protokola başçılıq etməyə başlayıb.
İkinci cəhddə çempionatın lideri Uqo Uqoçukvu ikinci pilləyə yüksəlib. İlk beşliyə düşmək uğrunda mübarizə aparan Taito Kato isə doqquzuncu döngədən çıxışda bordürə toxunduqdan sonra bolidinə nəzarəti itirərək trasdan çıxıb. Bu insident qısa müddətlik sarı bayraqların göstərilməsinə səbəb olub.
Heç bir sürücü Yamakoşinin nəticəsini yaxşılaşdıra bilməyib və o, karyerasında ilk dəfə Formula 3-də poul qazanıb. Mövsümün ilk üç sıralanma turunun qalibi Teofil Nael isə yalnız 24-cü nəticə göstərib.
Sprint yarışının start düzümü isə reversiv olacaq. İlk 12 yeri tutan sürücülər şənbə günü yarışa tərs ardıcıllıqla başlayacaqlar. Beləliklə, sprintə poul mövqeyindən Ceyms Uorton start verəcək. İlk cərgədə onun yanında Ernesto Rivera yer alacaq.
Şərh əlavə et