Həmiltonun son yarışlarda əla formada olduğunu və artıq çempionluq uğrunda mübarizəyə qoşulduğunu vurğulayan gənc pilot bildirib ki, belə rəqiblə mübarizə aparmaq heç də asan deyil:
Kimi Antonelli: “Lyuis hazırda əla formadadır. O, çempionluq mübarizəsinə qoşulub və onun kimi güclü rəqiblə mübarizə aparmaq heç də asan deyil. Açığı, arxamda Maks, Lando və ya Corc olsaydı da, vəziyyət eyni olardı. Belə vəziyyətləri dəfələrlə yaşamış, çox təcrübəli pilotlara qarşı yarışmaq həmişə çətindir. Lyuis Barselonada həqiqətən də çox təsirli idi. 2021-ci ildəki kimi çılğın çempionluq mübarizəsinə hazırammı? Hər şeyə hazır olmalıyam”.
İtalyan sürücü bildirib ki, qarşısına çıxan bu fürsətdən maksimum yararlanmaq niyyətindədir: “Mübarizə aparmağa və əlimdən gələnin ən yaxşısını etməyə hazıram. Çünki belə imkanlar hər il qarşına çıxmır. Mövsümün sonuna yaxın çempionluq uğrunda mübarizənin daha da qızışacağı ehtimalına hazır olmaq üçün indi öyrənə biləcəyim hər şeyi öyrənməyə çalışıram”.
Həmiltonun titul mübarizəsinə qoşulmasından sonra Antonelli komanda rəhbəri Toto Volf və komanda yoldaşı Corc Rassell ilə komanda daxilindəki mübarizə və öz sürüş tərzi barədə də danışdıqlarını qeyd edib. “Yarış zamanı emosiyalar çox yüksək olur. Həmin an yalnız qalib gəlmək və bacardığının ən yaxşısını etmək barədə düşünürsən. Bu hissləri nəzarətdə saxlamaq asan olmayacaq. Amma Toto və Corcla etdiyimiz söhbətlərdən sonra ortaq qərara gəldik: Artıq daha ağıllı yarışmalıyıq. Çünki məsələ artıq təkcə mən və Corc arasında deyil, arxadan gələn digər rəqiblər də var. Bu həftəsonundan etibarən yarış tərzim vəziyyətə uyğun dəyişəcək. Əgər rəqiblər bizə çox yaxındırlarsa, yalnız Corcla mübarizə apardığımız ssenaridən fərqli strategiya ilə yarışacağam”.
Şərh əlavə et