Hazırda Formula 2-də çıxış edən Beqanoviç ötən mövsümün əvvəlindən etibarən Ferrari ilə bir neçə dəfə sərbəst yürüş sessiyalarında iştirak edib. 22 yaşlı isveçli pilot 2025-ci ildə Bəhreyn və Avstriyada Leklerin yerinə olmaqla iki dəfə trasa çıxmışdı.
Bu mövsüm isə gənc pilot Barselonada Lyuis Həmiltonun bolidi ilə Formula 1 trasına qayıtmışdı. Barselona-Katalunya trasında keçirilən ilk sərbəst yürüş sessiyasında səkkizinci yeri tutan Beqanoviç, üçüncü olan Leklerdən təxminən 0,9 saniyə geri qalmışdı.
Avstriya Qran Prisi ərəfəsində Ferrari, Beqanoviçin Red Bull Ringdə keçiriləcək 1-ci sərbəst yürüş sessiyasında Lekleri əvəz edəcəyini rəsmən təsdiqləyib.
Formula 1 qaydalarına əsasən komandalar mövsüm ərzində hər boliddə iki dəfə olmaqla ümumilikdə dörd sessiyada gənc pilotlara şans verməlidirlər. Qaydalara görə gənc pilot statusu karyerasında ikidən çox Qran Pri yarışına çıxmamış sürücülərə şamil olunur.
Avstriyada digər komandalar da ilk sərbəst yürüş sessiyasında gənc pilotlardan istifadə edəcəklər. Cek Krouford Aston Martin AMR26-da Lens Strollu əvəz edəcək. Williams-da Luk Brauninq Karlos Saynsın yerinə trasa çıxacaq, Audi-də isə Paul Aron Qabriel Bortoletonun bolidinin sükanı arxasına keçəcək.
Şərh əlavə et