Red Bull Rinqdə hava temperaturunun 30 dərəcənin ortalarına, asfalt temperaturunun isə 50°C-dən yuxarı qalxacağı proqnozlaşdırılır. Bu səbəbdən pilotları fiziki baxımdan olduqca çətin yarış həftəsonu gözləyir. Formula 1 bu qaydanı 2023-cü il Qətər Qran Prisində müşahidə olunan ekstremal istilik və sürücülərin yaşadığı sağlamlıq problemlərindən sonra 2025-ci ildən etibarən tətbiq etməyə başlayıb.
“İstilik Təhlükəsi” protokolu hava temperaturu 31°C-ni keçdiyi və şəraitin təkcə rahatlığa deyil, eyni zamanda pilotların sağlamlığına da təsir göstərə biləcəyi hallarda qüvvəyə minir.
Protokol ilk dəfə 2025-ci il Sinqapur Qran Prisində tətbiq olunub. Həmin vaxt FIA-nın yarış direktoru Rui Markeş yarışdan əvvəl bununla bağlı rəsmi elan vermişdi.
Qaydalar çərçivəsində komandalar bolidlərə pilotların soyudulması üçün xüsusi sistemlər quraşdırmalı olurlar. Əlavə avadanlıqlara görə minimum bolid çəkisi də artırılır. Pilotlar soyuducu jiletdən istifadə edib-etməməkdə sərbəstdirlər, lakin istifadə etmədikləri halda balansın qorunması məqsədilə bolidə əlavə ballast yerləşdirilir.
FIA-nın idman reqlamentinə əsasən, soyutma sisteminin istifadə edilmədiyi hallarda çəki fərqi 0,5 kiloqram əlavə ballastla kompensasiya olunur.
Avropada davam edən isti hava dalğasının əsas səbəbi meteorologiyada “istilik qübbəsi” adlandırılan hadisədir. Bu proses atmosferin yuxarı qatlarında geniş və sabit yüksək təzyiq zonasının formalaşmasına gətirib çıxarır, nəticədə istilik bölgə üzərində sıxışıb qalır və havanın soyuması çətinləşir.
FIA bu həftənin əvvəlində istilik protokolu ilə bağlı yeni dəyişiklik də təsdiqləyib. Yeni qaydalara əsasən, protokol artıq sprint yarışı və əsas yarış üçün ayrı-ayrılıqda elan edilə bilər. Beləliklə, yarış həftəsonunda yalnız sprint və ya yalnız əsas yarış üçün “İstilik Təhlükəsi” rejimi tətbiq oluna bilər.
Lakin Avstriya Qran Prisi sprint formatında keçirilmədiyi üçün bu dəyişiklik həmin yarış həftəsonuna birbaşa təsir göstərməyəcək.
Şərh əlavə et