Həftəsonunun ikinci sərbəst yürüş sessiyasına start verilməsi ilə pilotlar trasda yer alıblar və 30 dəqiqəlik gerisayım başlayıb.
Sessiyanın hələ əvvəlində Yohann Zarko güclü dövrə vurarkən son döngədə motosikletinə nəzarəti itirərək qəzaya uğrayıb. Qısa müddət sonra ayağa qalxan sürücünün səhhətində problem olmadığı açıqlanıb və Zarko boksa qayıdıb.
Xoan Mir 1:39.425 nəticə ilə sessiyanın əvvəlində tempi müəyyən edib. Pedro Akosta 1:39.643-lük dövrəsi ilə ikinci pilləyə yüksəlib, Aleks Markes isə üçüncü yeri tutub.
Sessiyanın ilk 10 dəqiqəsi geridə qalarkən Xorxe Martin güclü temp tutaraq üçüncü yerə yüksəlməyi bacarıb. Sessiyanın yarısında – 15-ci dəqiqədə bütün pilotlar boksa qayıdaraq sazlanmaları yaxşılaşdırmağa fokuslanıblar.
Son 10 dəqiqəyə yaxın trasa qayıdan ilk pilot Aleks Rins olub. Rins 1:41.551 nəticə ilə sonuncu pilləyə enib. Ardınca pilotların əksəriyyəti yenidən sürətli dövrələr vurmağa başlayıblar.
Xorxe Martinin sessiyaya yenidən qoşulmadan əvvəl pit yolunda start məşqi etməsi diqqət çəkib. Normalda icazə verilməyən bu vəziyyətlə bağlı araşdırma başladılması ehtimal olunur.
Son dəqiqələrə girilərkən sürətli dövrəsini tamamlayan Toprak 1:40.371 nəticə ilə 16-cı sıraya yüksəlib. Xoan Mir dövrə vaxtını yaxşılaşdırmaq üçün temp tutmağa çalışsa da istədiyi nəticəni əldə edə bilməyib.
Fabio Kuartararo 1:39.756 nəticə ilə tamamladığı dövrə sayəsində 4-cü pilləyə yüksəlib.
Son dəqiqəyə girilərkən Marko Bezzekki 1:39.989, Pedro Akosta isə 1:39.697 nəticə əldə edib. Fabio Di Cianantonio isə 1:39.652 nəticə ilə 3-cü pilləyə yüksəlməyi bacarıb.
Şərh əlavə et