2026-cı il qaydaları ilə qüvvəyə minən Əlavə İnkişaf və Yenilənmə Fürsətləri (ADUO) güc qurğuları arasında performans fərqini azaltmağa və rəqabəti daha bərabər səviyyədə saxlamağa yönəlmiş yeni mexanizm kimi diqqət çəkib.
ADUO əsasən geridə qalan güc qurğusu istehsalçılarının rəqiblərinə çatmasına imkan verən sistem kimi fəaliyyət göstərir. Mövsüm ərzində müəyyən edilən üç qiymətləndirmə mərhələsində lider güc qurğusu ilə müqayisədə 2–4 faiz geri qalan istehsalçılara əlavə inkişaf hüquqları təqdim olunacaq.
Bu sistem performans balanslaşdırma mexanizmi kimi qiymətləndirilir. Lakin WEC-dən fərqli olaraq burada lider istehsalçının performansı məhdudlaşdırılmır, əksinə, geridə qalanların fərqi bağlaması hədəflənir.
2–4 faiz geri qalan istehsalçılara birdəfəlik inkişaf imkanı verilir, 4 faizdən çox geridə qalanlara isə daha geniş imkanlar yaradılır. Bu üstünlüklərə əlavə test vaxtı və büdcə limitində müəyyən elastikliklər də daxil edilib.
ADUO uzunmüddətli perspektivdə komandalar arasında böyük performans fərqlərinin yaranmasının qarşısını almağı hədəfləyir. Sistem xüsusilə Mercedes-in 2014-cü ildəki dominant dövrünə bənzər ssenarinin təkrarlanmasının qarşısını almaq üçün hazırlanıb. Bununla belə, qısa müddətdə möcüzəvi nəticələr vəd etmir.
Mattia Binotto Yaponiya Qran-prisində verdiyi açıqlamada güc qurğusunun inkişaf prosesinin uzun çəkdiyini vurğulayıb: “Güc qurğusunun inkişafı həqiqətən uzun zaman tələb edir. Biz də liderlə aramızdakı fərqin böyük hissəsinin məhz güc qurğusundan qaynaqlandığını bilirik.
İnkişaf planımız var, lakin bəzi sahələrdə irəliləyiş uzun çəkə bilər. Buna görə də hədəf kimi 2030-cu ili müəyyən etmişik. Səbirli olmalıyıq. Hər şeyi bir neçə yarışda həll etmək istərdik, amma bu mümkün deyil. Möcüzə yarada bilmərik, amma düzgün planla inkişaf edə bilərik”.
Honda da 2026-cı il mövsümünə çətin start verib və güc qurğusu baxımından geridə qalan istehsalçılar arasında yer alıb. Honda mühəndislərindən Şintaro Orihara həm etibarlılıq, həm də performans istiqamətində intensiv iş getdiyini bildirib: “Batareyanın dayanıqlılığını artırmaq üzərində işləyirik. Eyni zamanda güc qurğusunun performansı və enerji idarəetməsi üzərində fokuslanmışıq.
Güc qurğusunun inkişafı qısa müddətdə nəticə verən proses deyil. Amma yarışlardan topladığımız məlumatlar balans və enerji idarəetməsini təkmilləşdirmək üçün vacib rol oynayıb”.
ADUO sisteminin ilk qiymətləndirmə mərhələsi əslində mövsümün altıncı yarışından sonra keçirilməli idi. Lakin Bəhreyn və Səudiyyə Ərəbistanı mərhələlərinin ləğv olunması səbəbindən bu prosesin Monako Qran-prisindən sonraya təxirə salına biləcəyi qeyd olunub. Mövsüm ərzində bu qiymətləndirmələrin hər üç aydan bir keçirilməsi planlaşdırılıb.
Şərh əlavə et