Komandalar artıq maşınları çəkiliş günlərində və Barselonadakı qapalı testlərdə sınaqdan keçiriblər. Həmin mərhələ ilə müqayisədə əksəriyyəti yeniliklər gətirib, Audi-nin maşını isə saydpodların fərqli forması səbəbindən vizual olaraq da dəyişib.
İlk saatlarda əsas diqqət aerodinamikaya yönəldilib. Sürücülər aerodinamik boya və hava təzyiqini ölçən sensor barmaqlıqları ilə trasa çıxaraq sabit sürətlə dövrələr vurublar.
Sessiya bir dəfə Alpine-in maşınındakı problemə görə qırmızı bayraqlarla dayandırılıb, lakin bokslarda yoxlamadan sonra Franko Kolapinto yenidən trasa qayıdıb.
Heç kim sürət üzərində işləməyib. Belə ki, komandalar tamamilə başqa tapşırıqları yerinə yetirib, əsas məqsəd məsafə qət etmək olub və bu iş kifayət qədər uğurlu alınıb. Artıq ilk günün səhər sessiyasında bəzi sürücülər yarış məsafəsindən (Bəhreyndə 57 dövrə) daha çox məsafə qət ediblər.
Protokola Maks Ferstappen başçılıq edib. O, Medium təkərlərlə 1:35.433 zaman nəticəsi göstərib. Hələlik zamanlar ötən ilin göstəricilərindən xeyli uzaqdır. 2025-ci ildə ilk günün səhər sessiyasında ən yaxşı nəticə düz dörd saniyə daha sürətli olub.
Bir saatlıq fasilədən sonra testlər davam edəcək. Əksər komandalarda sürücü dəyişiklikləri baş tutacaq.
Birinci Gün – Səhər Sessiyası
| # | Sürücü | Komanda | Ən sürətlidən fərq | Dövrə |
| 1 | Max Verstappen | Red Bull | 1:35.433 | 65 |
| 2 | Oscar Piastri | McLaren | +0.169 | 54 |
| 3 | George Russell | Mercedes | +0.675 | 56 |
| 4 | Lewis Hamilton | Ferrari | +1.000 | 52 |
| 5 | Esteban Ocon | Haas | +1.736 | 63 |
| 6 | Arvid Lindblad | Racing Bulls | +2.512 | 75 |
| 7 | Carlos Sainz | Williams | +2.788 | 77 |
| 8 | Gabriel Bortoleto | Audi | +3.438 | 49 |
| 9 | Valtteri Bottas | Cadillac | +3.717 | 49 |
| 10 | Lance Stroll | Aston Martin | +4.450 | 33 |
| 11 | Franco Colapinto | Alpine | +4.897 | 28 |
Şərh əlavə et