Britaniya şirkətinin təhlükəsizlik avtomobili kimi Formula 1-ə ilk girişi müəyyən mübahisələrə də səbəb olmuşdu. Həmin dövrdə istifadə edilən Vantage F1 Edition, Mercedes-in təqdim etdiyi AMG GT Black Series modeli ilə müqayisədə daha ağır və xeyli dərəcədə zəif gücə malik idi.
Mercedes-dən 45 kiloqram daha ağır olan və təxminən 200 at gücü az istehsal edən Aston Martin, sürət baxımından da geridə qalırdı. Bu vəziyyət, 2022-ci ilin Avstraliya Qran Prisi zamanı Maks Ferstappenin avtomobilə “yaşıl tısbağa” ləqəbi verməsinə səbəb olmuşdu.
Red Bull komandasının pilotu Melburn yarışından sonra belə demişdi: “Təhlükəsizlik avtomobili o qədər yavaş idi ki, tısbağaya bənzəyirdi. İnanılmaz idi.
Arxa düzlükdə 140 km/saat sürətlə getməli olduq, ortada zədələnmiş avtomobil də yox idi. Niyə bu qədər yavaş getdiyimizi başa düşmürəm. Bunu araşdırmalıyıq”.
Aston Martin 2024-cü il mövsümünün əvvəlində təkmilləşdirilmiş Vantage modelini təqdim etmişdi. Daha böyük turbolar, inkişaf etdirilmiş soyutma sistemi və yeni eksantrik valları sayəsində güc 656 at gücünə yüksəlib, yəni təxminən 150 at güclük artım əldə edilib.
Ötən il Niderland Qran Prisi zamanı isə Aston Martin təhlükəsizlik avtomobili kimi daha da yenilənmiş Vantage S modelini trasa çıxarıb. Bu versiyada 4.0 litrlik cüt turbo V8 mühərrik təxminən 670 at gücü istehsal edib.
Aston Martin-in bu roldan niyə imtina etməyə qərar verdiyi hələlik dəqiqləşməyib. Bunun kommersiya səbəbləri ilə əlaqəli ola biləcəyi ehtimal edilir.
Bununla da Mercedes 2026-cı il mövsümü boyunca Formula 1-in təhlükəsizlik və tibbi avtomobillərinin hamısını təkbaşına təmin edəcək.
Alman şirkəti 1996-cı ildən bu yana Formula 1-in təhlükəsizlik avtomobilini tədarük edir. “Gümüşü oxlar” 2022-ci ildən etibarən bu rol üçün Mercedes-AMG GT Black Series modelini istifadəyə verib.
Son dövrlərdə təhlükəsizlik avtomobili, komandanın sponsoru CrowdStrike-ın brendləşdirilməsi ilə qırmızı rəngə boyanıb.
Şərh əlavə et