Kokpit.az bildirir ki, alman təmsilçisi maliyyə-texnologiya şirkəti Revolut ilə strateji tərəfdaşlıq çərçivəsində Audi Revolut F1 Team adını alıb.
Audi-nin təqdimat mərasimi 20 yanvar tarixində Berlində keçiriləcək. Komandanın mətbuat xidməti bildirib ki, tədbir çərçivəsində Audi brendinin əsas dəyərləri — aydınlıq, texniki mükəmməllik və emosiyalar ön plana çıxarılacaq.
Audi-nin İdarə Heyətinin sədri Gernot Döllner bunları deyib: “Audi Revolut F1 Team adının və loqotipinin təqdim olunması avtoidmandakı zirvəyə doğru yolumuzda növbəti mühüm mərhələni simvolizə edir. Bu iki element ambisiyalarımıza aydın identiklik qazandırıb, güclü baxışı və yenilikçi ruhu əks etdirib.
İndi isə yanvar ayında Berlində keçiriləcək tədbiri səbirsizliklə gözləyirik, çünki məhz orada Audi tarixindəki bu həyəcanverici yeni fəsli rəsmi şəkildə dünyaya təqdim edəcəyik”.
Audi F1 layihəsinin rəhbəri Mattia Binotto bildirib: “Bu elanla biz gördüyümüz inanılmaz işə ad və sima qazandırırıq. Komanda dəqiqlik mədəniyyəti və fasiləsiz irəliyə doğru hərəkət ruhu ilə formalaşıb.
Berlin təqdimatı kollektiv olaraq ilk dəfə bir araya gələcəyimiz tədbir olacaq və biz 2026-cı ildəki debütümüz ərəfəsində dünyanın hər yerindən azarkeşlərimizi bu macəraya qoşulmağa dəvət edəcəyik”.
Komandanın rəhbəri Conatan Vitli isə qeyd edib: “Bu gün layihəmiz rəsmi adını aldı. Audi Revolut F1 Team Almaniya, Böyük Britaniya və İsveçrədəki kollektivlərimizin, eləcə də tərəfdaşlarımızın birləşmiş gücünü təcəssüm etdirir. Hamımız 2026-cı ilə gedən yolda bu ad altında birləşmişik.
Bu, bütün layihəyə əlavə impuls verən və uzunmüddətli ambisiyalarımızı hər kəs üçün daha aydın və hiss olunan edən mühüm mərhələdir”.
Şərh əlavə et