Yarışın son dövrəsində Marko Bezzekkini geridə qoyan ispan pilot bununla da qələbə seriyasını davam etdirib.
Poul mövqeyindən başlayan Markes birinci döngədə liderliyini qoruyub, lakin trasdan kənara çıxaraq, beşinci yerə qədər geriləyib. Birinci yerə Marko Bezzekki yüksəlib. İlk dövrələrdə Bezzekkini Franko Morbidelli və Fabio Kuartararo izləyiblər. Lakin Morbidelli sıralanma turunda yıxıldığı 8-ci döngədə yenidən qəzaya uğrayaraq yarışı tərk edib.
Bu arada Markes Fabio di Canantonionu keçərək, üçüncü yerə yüksəlib.
Kuartararo və Markes lider Bezzekkinin izinə düşüblər. Onların ardınca gələn Pedro Akosta trasdan çıxıb və yarışa 10-cu yerdə dönə bilib. Markes yarışın ortalarında Kuartararonu geridə qoyaraq ikinci yerə yüksəlib. Bezzekki isə 1.5 saniyəlik fərqlə ön sıradakı yerini qoruyub.
Ancaq son dövrəyə başlayarkən Markes fərqi bağlayıb və ilk iki döngədə etdiyi cəsarətli hücumla liderliyi ələ keçirib. Bu manevrlə sprint yarışını qazanan Markes liderliyini bir az da möhkəmləndirib.
Fabio Kuartararo isə üçüncü yeri tutaraq, Yamaha üçün mövsümün ilk sprint podiumunu əldə edib. Bu, fransız sürücünün 2023-cü ildəki Assen Qran Prisindən sonra ilk sprint podiumu olub.
Şərh əlavə et