Azərbaycan Qran Prisinin nəticələrini Britaniya komandasının rəhbəri Ceyms Vovlz şərh edib: “İlk növbədə Bakıya gətirdiyimiz texniki yeniliklər kompleksini hazırlamaq üçün gecə-gündüz yorulmadan çalışan hər kəsə təşəkkür etmək istəyirəm. İki yeni şassi hazırlamaq, eyni zamanda FW48-in çəkisini əhəmiyyətli dərəcədə azaltmaq və aerodinamikasını yeniləmək heç də asan məsələ deyildi.
Bu barədə bir neçə ay əvvəl danışmağa başlamışdıq, lakin ötən həftəsonu qarşıya qoyduğumuz vəzifəni yerinə yetirdik. Hamı gördü ki, artıq sıralanma turunda yaxşı nəticə göstərə bildik. Karlos Sayns 9-cu ən yaxşı nəticəni göstərsə də, aldığı cəzaya görə yarışa 14-cü yerdən başladı.
Yarışımız isə fərqli şəkildə inkişaf etdi. Müəyyən mərhələdə Karlos sıralanma turunda göstərdiyi tempi saxlaya bilmədi. Bunun nə ilə bağlı olduğunu artıq təxminən başa düşürük. Lakin Karlos sona qədər mübarizə apararaq xal qazanmağa çalışdığı üçün tərifə layiqdir.
Alekslə bağlı isə təəssüflənməkdən başqa əlimizdən heç nə gəlmir. O, əla pilotaj nümayiş etdirirdi, lakin küləyin qəfil güclənməsi səbəbindən sürətini kifayət qədər azalda bilmədi və divara çırpıldı. Amma bu, sadəcə Bakı faktorudur. Bura şəhər trasıdır və belə hallarda səhvin qiyməti çox yüksək olur.
Malayziya mərhələsinə qədər onun bolidini təmir edəcəyik. Bir daha qeyd edirəm ki, ardıcıl üç Qran Pridən ibarət seriyaya inamlı başlamışıq, lakin qarşıda hələ çox iş var”.
Şərh əlavə et