Britaniyalı sürücü Bakıdakı yarışı 7-ci yerdə başa vuraraq 6 xal qazanıb. Lakin onun yarışı komanda yoldaşı Liam Lousonla yaşadığı təmasın kölgəsində qalıb.
Williams pilotu Aleks Elbonun qəzasından sonra tətbiq olunan təhlükəsizlik avtomobili rejiminin başa çatması ilə verilən restart zamanı Lindblad qarşısındakı komanda yoldaşı Louson və Haas pilotu Esteban Okondan daha gec əyləclənib.
Nəticədə iki avtomobilin arasında sıxışan Lindblad Lousonla təmas edib. Zərbənin təsirindən Louson fırlanıb və yarışı 12-ci yerdə, xal zonasından kənarda başa vurub.
Hadisə stüardlar tərəfindən araşdırılsa da, Lindblada heç bir cəza verilməyib. Stüardlar qərarın səbəbi kimi Lindbladın manevr zamanı “məhdud sahəyə” malik olmasını göstərib və əlavə araşdırmaya ehtiyac olmadığı qənaətinə gəliblər.
Yarışdan sonra Lindblad sosial media hesabında paylaşım edərək hadisəyə görə məsuliyyəti üzərinə götürüb. O, eyni zamanda komandanın güc qurğusunun performansını yüksək qiymətləndirib.
Arvid Lindblad: “Güclü yarış keçirdik. 7-ci yerdə finiş görməkdən həqiqətən çox xoşbəxtəm. Asan həftəsonu olmadı və bəzi məsələləri idarə etmə tərzimlə bağlı məyusluq yaşayıram.
Komanda olaraq biz də çətinliklərlə üzləşdik. Buna görə çətin həftəsonundan sonra toparlanaraq bu gün əlimizdən gələnin ən yaxşısını edə bilməyimiz məni çox sevindirir. Güc qurğusu komandasına ayrıca böyük təşəkkür edirəm. Mənə sözün əsl mənasında raket verdilər.
Liamla yaşananlara görə çox üzgünəm, üzr istəyirəm, dostum! Buna baxmayaraq, komandaya bir neçə xal qazandıra bilməyimiz sevindiricidir.”
Louson isə yarışdan dərhal sonra Sky Sports F1-ə açıqlamasında təmasın avtomobilinin döşəməsinə zərər vurduğunu bildirib.
“Buna yenidən baxmalıyam. Restart zamanı hamımız 1-ci döngəyə doğru gedirdik və sol tərəfimdən zərbə aldım. Döşəmədə də deşik yarandı.
Buna görə onun hansı boşluqdan istifadə etməyə çalışdığını həqiqətən bilmirəm. İkimiz də 1-ci döngəyə daxil olduğumuz anda arada qalmış vəziyyətdə bunu başa düşə bilmirəm.”
Şərh əlavə et