Azərbaycan yarışının 36-cı dövrəsində təhlükəsizlik avtomobilindən sonra restart zamanı Franko Kolapinto ilk döngədə təkərlərini bloklayıb. Nəticədə o, özü ilə yanaşı komanda yoldaşı Pyer Qasly və Lando Norrisin yarışına da təsir edən qəzanın iştirakçısına çevrilib.
Qəzadan sonra ciddi şəkildə əsəbiləşən Norris Kolapintonun Formula 1 səviyyəsində pilot olmadığını bildirib və onun yarışlardan uzaqlaşdırılmalı olduğunu deyib. Lakin britaniyalı pilot iki gün sonra bu sərt ifadələrinə görə argentinalı pilotdan üzr istəyib.
Lando Norris Kolapintoya şəxsən mesaj göndərərək dediyi sözlərə görə üzr istədiyini bildirib. McLaren pilotu sosial media hesabında bunları yazıb: “Bakı ümumilikdə çətin həftəsonu oldu və əlbəttə ki, yarışın belə erkən başa çatması məyusedicidir.
Yarışdan sonra Frankoya mesaj göndərərək deməməli olduğum sözləri dediyim üçün üzr istədim. Hadisəyə daha yaxşı yanaşmalı idim. Emosiyalarım mənə üstün gəlmişdi, amma bu, bəhanə deyil. Səhv etmişdim.
İllər ərzində mən də səhvlərə yol vermişəm və bunun yarışmağın, limitlərdə mübarizə aparmağın bir hissəsi olduğunu çox yaxşı bilirəm.
Franko ilə bir-birimizi başa düşərək ortaq məxrəcə gəldik. Hələ də yaxşı dostuq və hər ikimiz bu həftəsonu yenidən yarışacaq olmaqdan ötrü həyəcanlıyıq”.
Şərh əlavə et