Kokpit.az xatırladır ki, niderlandlı sürücü Şpilberqdə sıralanma turundakı son cəhdində yaxşı nəticə ilə gəlirdi, lakin o, qəza edərək, bariyerlərə çırpılıb və mübarizəni dayandırıb
Qəza ilə nəticələnən sürətli dövrəsindən danışan dördqat Dünya Çempionu belə söyləyib: “Həmin dövrədə, 6-cı döngənin girişində çox qəribə bir an yaşadım. Bütün həftəsonu ərzində belə bir hiss yaşamamışdım. Buna görə də vəziyyət mənə çox qəribə gəldi və avtomobildə problemin nə olduğunu da tam anlaya bilmədim. Daha sonra 9-cu döngədə arxa hissə tamamilə nəzarətdən çıxdı.
Həmin anda etdiyim hərəkət kiçik bir əks-düzəliş deyildi. Sükanı demək olar ki, tam döndərməli oldum. Dediyim kimi, vəziyyət bir az qəribədir və buna görə də hər şeyi ətraflı araşdırıb nə baş verdiyini anlamalıyıq”.
Ferstappen bildirib ki, qəza baş verməsəydi, ilk üçlük uğrunda mübarizə aparmaq real hədəf idi: “Təəssüf, çünki realist danışsaq, üçüncü yeri tutmaq mümkün idi. Ancaq hazırda bizim üçün yaxşı start almaq çox çətindir. Hətta üçüncü yerdən başlasaydıq belə, ilk metrlərdə beşinci yerə geriləyə bilərdik.
Yeniliklərlə bağlı hələ də anlamalı olduğumuz məqamlar var. Bəziləri yaxşı işləyir, bəzilərində isə sanki geriyə addım atmışıq. Əlimizdə olan məlumatlar üzərində işləməyə davam edəcəyik”.
Şərh əlavə et