Rassell Avstriyada 3-cü sərbəst yürüşü lider başa vurub

Sessiyadan əvvəl havanın temperaturu 30°C, asfaltın temperaturu isə 48°C ölçülüb. Start siqnalından sonra bir saatlıq sessiya başlasa da, ilk dəqiqələrdə trasa çıxan yeganə pilot Serxio Peres olub.

Sessiyanın ilk 10 dəqiqəsində trasda tək dövrələr vuran Peres ən yaxşı nəticəsini 1:10.944 olaraq qeydə alıb. Daha sonra Franko Kolapinto, Niko Hülkenberq və Ayzek Hacar da daxil olmaqla digər pilotlar da trasa çıxmağa başlayıblar.

Sessiyanın əvvəlində Kolapinto 1:09.829 nəticə ilə Peresi geridə qoyaraq liderliyə yüksəlib. Ardınca Hülkenberq 1:09.684 nəticə ilə onun vaxtını üstələyib.

Ayzek Hacar isə 1:09.230 nəticə ilə erkən tempi müəyyənləşdirən pilot olub. Ondan sonra dövrəsini tamamlayan Peres rəqabətədavamlı nəticə göstərə bilməyib.

Sessiyanın ilk 15 dəqiqəsi geridə qalarkən digər pilotlar da trasa çıxıblar. Fernando Alonso 1:11.704 nəticə ilə Peresin arxasında beşinci pilləyə yüksəlib. Lando Norris 1:07.832 nəticə ilə liderliyə çıxıb. Lyuis Həmilton 1:08.117 nəticə ilə ikinci, Corc Rassell isə 1:08.332 nəticə ilə üçüncü olub.

Lider olan Norris avtomobilinin sol güzgüsünün qırıldığını bildirdikdən sonra pitə çağırılıb. Onun komanda yoldaşı Oskar Piastri isə 1:07.881 nəticə ilə ikinci pilləyə yüksəlib.

İlk sürətli dövrəsini tamamlayan Kimi Antonelli 1:07.553 nəticə ilə McLaren pilotlarını geridə qoyaraq zirvəyə yüksəlib. Az sonra Maks Ferstappen də ilk cəhdində 1:07.804 nəticə göstərərək ikinci olub.

Rassell komanda yoldaşı Antonellidən cəmi 0.173 saniyə geri qalaraq ikinci yerə yüksəlsə də, Şarl Lekler daha güclü dövrə vuraraq onu qabaqlayıb.

Sessiyanın ikinci yarısında Ferstappen 1:07.746 nəticə ilə dördüncü pilləyə yüksəlib. Rassell isə 1:07.550 nəticə ilə ikinci yeri geri alıb.

Sürətli dövrəsi zamanı sağ ön təkərində bloklanma yaşayan Rassell bunu radio vasitəsilə komandasına bildirib.

Norris 1:07.681 nəticə ilə üçüncü yerə yüksəlib. Lakin Piastri 1:07.671 nəticə ilə komanda yoldaşını geridə qoyub.

Yeddinci yerdə olan Həmilton 1:07.940 nəticə göstərərək vaxtını yaxşılaşdıra bilməyib. Antonelli isə 1:07.134 nəticə ilə liderliyini daha da möhkəmləndirib.

Sessiyanın son 20 dəqiqəsinə girilərkən ilk onluqdakı pilotların əksəriyyəti pitə qayıdıb.

Sürətli dövrəsini başa vurduqdan sonra Alonso radio vasitəsilə avtomobilin döngələrdə istədiyi kimi davranmadığını və ön qanadda problem ola biləcəyini bildirib.

Norris 1:07.360 nəticə ilə qısa müddətlik ikinci yerə yüksəlsə də, Həmilton dərhal cavab verərək 1:07.211 nəticə ilə onu qabaqlayıb.

Sessiyanın son dəqiqələrində Hacar doqquzuncu yerə yüksəlib. Lekler 1:07.623 nəticə ilə yeddinci yerdə qalıb. Rassell isə 1:07.096 nəticə ilə komanda yoldaşı Antonellini cüzi fərqlə geridə qoyaraq liderliyə yüksəlib.

Ferrari pilotları son anlarda nəticələrini yaxşılaşdırmağa çalışsalar da, nə Lekler yeddinci, nə də Həmilton üçüncü yerdən irəli gedə bilib.

Beləliklə, damalı bayraqla birlikdə üçüncü sərbəst yürüş başa çatıb. Corc Rassell sessiyanı lider tamamlayıb, Kimi Antonelli ikinci, Lyuis Həmilton isə üçüncü yeri tutub.