Çexiya Qran Prisi öncəsi hava temperaturu 32°C, trasın temperaturu isə 48°C ölçülüb. Sürücülər isinmə dövrəsini tamamladıqdan sonra start düzülüşündə yerlərini alıblar və 21 dövrəlik yarışa start verilib.
İlk döngəyə çatarkən poul mövqeyindən başlayan Ai Oqura üstünlüyünü qorumağı bacarıb. 21-ci sıradan start alan Toprak Razqatlıoğlu isə iki mövqe qazanaraq 19-cu yerdən 18-ci pilləyə yüksəlib. Françesko Banyaya da altıncı döngədə Mark Markesi keçərək ikinci yerə qalxıb.
İkinci dövrədə Pedro Akosta Dioqo Moreiranı geridə qoyaraq dördüncü pilləyə yüksəlib. İkinci yerdə gedən Banyaya liderlik uğrunda Oquraya hücum edib. O, qısa müddətlik önə keçsə də, yapon sürücü trayektoriyasını qoruyaraq birinci yeri əlində saxlaya bilib. Lakin Banyaya 10-cu döngədə növbəti hücumunu uğurla tamamlayaraq yarışın liderliyini ələ keçirib.
İkinci dövrənin sonlarına yaxın Fabio Kuartararo motosikletinin idarəetməsini itirərək qəzaya uğrayıb və mübarizəni dayandırıb. Üçüncü dövrədə Mark Markes də Oquranı geridə qoyaraq komanda yoldaşı Banyayanın arxasında ikinci yerə yüksəlib.
Dördüncü dövrədə Markes tempini artıraraq liderlə arasındakı fərqi azaltmağa başlayıb. Altıncı dövrədə artıq 16-cı yerə yüksələn Toprak yarışın erkən mərhələsində ən yaxşı Yamaha sürücüsü olub.
Yarışın ikinci yarısına qədər Banyaya ilə Markes arasındakı fərq təxminən yarım saniyə civarında qalıb. İlk iki sektorda Markes üstün görünsə də, son iki sektorda Banyaya daha sürətli olub.
11-ci dövrənin sonuna yaxın Markes fərqi 0.149 saniyəyə qədər azaldıb. Həmin dövrədə Banyaya və Markes eyni dövrə vaxtını qeyd ediblər. Ai Oqura da tempini qoruyaraq Markeslə arasındakı yarım saniyəlik fərqin açılmasına imkan verməyib.
13-cü dövrədə Markes bir qədər sürət itirib və ilk iki sürücü arasındakı fərq yenidən yarım saniyəyə yaxınlaşıb. Fabio Di Cannantonio 7-ci döngədə Pedro Akostanı keçərək dördüncü yerə yüksəlib. Bu vaxt Oqura 1:53.392 nəticə ilə yarışın ən sürətli dövrəsini vurub.
Yarışın son yeddi dövrəsinə girilərkən ilk üçlük arasında gərgin mübarizə başlayıb. Markesin təzyiqinə baxmayaraq Banyaya uzun müddət müdafiə oluna bilib. Lakin ispaniyalı sürücü rəqibinin arxa təkərinə qədər yaxınlaşaraq hücum imkanını saxlayıb.
16-cı dövrədə Oqura ilə Markes arasındakı fərq 0.700 saniyəyə qədər artıb. Elə həmin dövrədə Markes soyuqqanlı manevrlə Banyayanı keçərək liderliyə yüksəlib. Banyayanın ikinci yerə enməsindən sonra Oqura yenidən fərqi azaltmağa başlayıb. Markes isə liderlikdə üstünlüyünü 0.769 saniyəyə qədər artırıb.
Son beş dövrədə Oqura Banyaya üzərində təzyiqini daha da gücləndirib. Bir qədər sonra 10-cu döngədə etdiyi hücumla italiyalı sürücünü geridə qoyaraq ikinci pilləyə yüksəlib.
Növbəti dövrədə Markeslə Oqura arasındakı fərq 0.701 saniyəyə çatıb. Bu vaxt 19-cu yerdə gedən Aleks Rins mexaniki problem səbəbindən boksa qayıdaraq yarışı tərk edib.
Yarışın son üç dövrəsində Pedro Akosta ilə Xoan Mir arasında beşinci yer uğrunda maraqlı mübarizə yaşanıb. Bir neçə dəfə mövqe dəyişməsinə baxmayaraq, üstün tərəf Akosta olub.
Son iki dövrəyə girilərkən Oqura ilə Banyaya arasındakı fərq 1.289 saniyəyə çatıb. Lider Markeslə fərq isə yarım saniyə ətrafında qalıb. Buna baxmayaraq, son dövrələrdə sıralamada dəyişiklik baş verməyib və Mark Markes damalı bayrağı birinci keçərək 2026-cı il Çexiya Qran Prisinin qalibi olub.
Pedro Akostanın son dövrədə motosikletində yaranan problem səbəbindən yarışı dayandırması Toprak Razqatlıoğlunun bir pillə irəliləyərək 15-ci yerə yüksəlməsinə şərait yaradıb. Türkiyəli sürücü qısa müddət sonra Maverik Vinyalesi də geridə qoyaraq 14-cü pilləyə yüksəlib və yarışın ən yaxşı Yamaha sürücüsü kimi xal zonasına düşüb.
Şərh əlavə et