MotoGP üzrə San Marino Qran Prisinin əsas məşq sessiyasını Marko Bezzekki zirvədə tamamlayıb.
Start siqnalının verilməsi ilə bir saatlıq əsas məşq sessiyası başlayıb.
İlk dövrələrdə Bezzekki 1:31.133-lük nəticə ilə qısa müddətə tempi müəyyənləşdirib. Lakin Aleks Markes 1:31.016-lıq dövrə ilə liderliyi ələ keçirib.
Sessiyanın ilk 15 dəqiqəsi geridə qalanda Bezzekki yenidən ən sürətli dövrəni vuraraq 1:30.792 nəticə ilə liderliyi geri alıb. Aleks Markes isə çox keçmədən 0.154 saniyəlik üstünlüklə yenidən birinci pilləyə yüksəlib.
Sessiyanın ilk bölümündə sürücülər daha çox dövrə vaxtlarına deyil, trasın vəziyyətini qiymətləndirməyə fokuslanıblar.
Sessiyanın ortalarına yaxın sürücülərin əksəriyyəti sazlamaları optimallaşdırmaq və əldə olunan məlumatları təhlil etmək üçün boksa qayıdıb.
Sessiyanın ikinci yarısında Bezzekki dövrə vaxtını yaxşılaşdıraraq yenidən zirvəyə yüksəlib. Ardınca Franko Morbidelli 1:30.934-lük nəticə göstərərək ikinci pilləyə qalxıb.
Xorxe Martin 1:31.276-lıq dövrə ilə şəxsi ən yaxşı nəticəsini göstərsə də, doqquzuncu pillədə qalıb.
Sessiyanın son 20 dəqiqəsində sürücülərin əksəriyyəti yenidən boksa daxil olub.
Pitdən qayıtdıqdan sonra Fabio Di Canantonio 1:30.720-lik dövrə ilə qısa müddətə liderliyi ələ keçirib. Lakin Luka Marini 1:30.668-lik nəticə göstərərək birinci pilləyə yüksəlib.
Sessiyanın bitməsinə 10 dəqiqə qalmış Pedro Akosta 1:30.558-lik dövrə ilə liderliyi ələ keçirib. Motosikleti dövrə zamanı sürüşsə də, Akosta nəticəsini yaxşılaşdıraraq 1:30.488-lik vaxt göstərib. Lakin ardınca sürətli dövrəsini tamamlayan Mark Markes 1:30.247-lik nəticə ilə zirvəyə yüksəlib.
Sessiyanın son 5 dəqiqəsinə Mark Markes lider kimi daxil olub. Aleks Markes 1:30.391-lik nəticə ilə üçüncü, Bezzekki isə ikinci pillədə qərarlaşıb.
Son dəqiqələrdə Aleks Markes dövrə vaxtını yaxşılaşdıraraq ikinci pilləyə yüksəlib və Bezzekki üçüncü yerə düşüb.
Lakin Bezzekki son cəhdində 1:30.144-lük nəticə göstərərək liderliyi yenidən ələ keçirib.
Beləliklə, San Marino Qran Prisinin əsas məşq sessiyasını Marko Bezzekki lider, Mark Markes ikinci, Aleks Markes isə üçüncü pillədə tamamlayıb.
Şərh əlavə et