Günün son sessiyası isti və quru hava şəraitində başlasa da, tras boyunca güclü külək əsib.
Pilotların əksəriyyəti ön təkərdə yumşaq, arxa təkərdə isə orta tərkibə üstünlük veriblər.
Cek Miller altıncı döngədə qəza keçirib. Pramak Yamaha motosikletində nəzərəçarpacaq zədələrin olması və ondan çınqıl parçalarının qopması səbəbindən Millerə qara-narıncı bayraq göstərilib. Bu, qaraja qayıtmayacağı təqdirdə onu cəzanın gözlədiyi anlamına gəlirdi.
Marko Bezzekki üçün də sessiya uğursuz hadisə ilə yadda qalıb. Üçüncü döngədən çıxarkən Aleks Markesin motosikletinə arxadan çırpılan italiyalı pilotun motosikletindən bir parça qopub. Bezzekki daha sonra çınqıllıq sahəyə çıxaraq yıxılıb. Hadisə ilə bağlı araşdırma başladılıb.
Trasda qalan motosiklet hissələrinə görə qırmızı bayraq göstərilib. Sessiya bərpa olunduqda zaman cədvəlinə Mark Markes başçılıq edib.
Lakin bir neçə dəqiqə sonra Xorxe Martin liderliyi ələ keçirib, Pedro Akosta isə ikinci pilləyə yüksəlib.
Sessiyanın ortalarında bu həftəsonu Toprak Razqatlıoğlunu əvəz edən Auqusto Fernandes 11-ci döngədə qəza keçirib.
Ön təkərdə orta, arxa təkərdə isə sərt tərkibə keçən Marko Bezzekki birinci pilləyə yüksəlib. Daha sonra Pedro Akosta 1:27.208 nəticə ilə sessiyanın lideri olub.
Son dəqiqələrdə liderlik uğrunda mübarizə davam edib. Sessiyanın son saniyələrində Aleks Markes də qəza keçirib.
Damalanmış bayraq göstərildikdə Marko Bezzekki əsas məşq sessiyasını birinci pillədə başa vurub. Raul Fernandes ikinci, Mark Markes üçüncü, Ay Oqura isə dördüncü yeri tutub. İlk beşliyi Xorxe Martin tamamlayıb.
Şərh əlavə et