Belçika F2 – Kamara inamlı qələbə qazanıb

Yarışın startı Kamara üçün uğursuz alınıb. O, yerindən zəif tərpənib və ART Grand Prix pilotu Tasanapol İntrafuvasak liderliyi ələ keçirib. Tsolov isə Aleks Dannı geridə qoyaraq üçüncü yerə yüksəlib. Bolqar pilot hətta Kamaranı da ötməyə yaxın olsa da, braziliyalı mövqeyini qorumağı bacarıb.

Lakin ilk dövrədə bir neçə insident yaşanıb. Qabriyele Mini ilə Roman Bilinski toqquşub, Dino Beqanoviç yerindən tərpənə bilməyib, Oliver Götenin bolidi isə start-finiş düzlüyündə dayanıb. Nəticədə təhlükəsizlik avtomobili trasa çıxıb.

Restartdan sonra Tsolov Kamaraya hücum edib, lakin braziliyalı rəqibini trasdan kənara sıxışdırıb. Pilotlar arasında təmas yaşanıb və Tsolov bu epizoddan sonra radio vasitəsilə komandaya narazılığını bildirib.

Bolqar pilot yol kənarına çıxaraq bir neçə mövqe itirib. Üstəlik, bolidinin ön qanadı zədələndiyi üçün tempi də aşağı düşüb. Beşinci dövrədə onu əvvəlcə Niko Varrone, daha sonra isə Con Bennett, Martinius Stenshorn və Lorens van Hupen keçiblər. Beləliklə, Tsolov cəmi bir dövrə ərzində ilk onluğun sonuna geriləyib.

Bu vaxt Kamara liderliyi ələ keçirib və ilk pit-stop edən pilotlardan biri olub. Onunla birlikdə Tsolov da boksa yollanıb. Yarışa isə müvəqqəti olaraq Kamaranın komanda yoldaşı Coşua Dyurksen başçılıq edib.

Səkkizinci dövrədə Lorens van Hupen səkkizinci döngədə ağır qəza keçirib. Pilot sürətlənmə zamanı bordür üzərində qaz pedalını həddindən artıq sərt basdığı üçün bolidinə nəzarəti itirib və baryerlərə çırpılıb. Van Hupen xəsarət almasa da, trasa yayılan qırıntılar və zədələnmiş təhlükəsizlik baryerləri səbəbindən yarış qırmızı bayraqlarla dayandırılıb.

Bütün bolidlər pit-leynə qayıdıblar. Marşallar trası təmizləyərkən bəzi komandalar təkərləri dəyişib, Tsolovun bolidində isə ön qanad hissəsi yenisi ilə əvəz olunub.

Doqquz dövrə arxada qaldıqdan sonra yarış uzun fasilədən sonra təhlükəsizlik avtomobilinin arxasında yenidən start götürüb. Vaxt məhdudiyyətinə görə yarış məsafəsinin qısaldılacağı əvvəlcədən məlum idi.

Restartdan bir dövrə sonra bir neçə pilot məcburi pit-stopunu yerinə yetirmək üçün boksa yollanıb. Çünki qırmızı bayraq zamanı pit-leynə giriş məcburi pit-stop hesab edilmirdi. Bu səbəbdən Kolton Herta və Sebastyan Montoya yeni təkərlər üçün boksa dönərək pelotonun sonuna düşüblər.

Bu mərhələdə Dyurksen lider idi, onu Varrone izləyirdi. Lakin Con Bennett və Kuş Maini hər iki pilota ciddi təzyiq göstərirdi. Kamara da bir neçə rəqibini geridə qoyaraq dördüncü yerə yüksəlib.

Az sonra Emerson Fittipaldi yeddinci döngədə trasdan çıxıb və yenidən təhlükəsizlik avtomobili trasa çıxıb. Bundan istifadə edən pit-stop etməmiş pilotlar boksa üz tutublar. Son restart yarışın bitməsinə 12 dəqiqədən az qalmış verilib.

Restart zamanı Rafael Kamara lider idi. Onu Aleks Dann, Noel Leon, Tasanapol İntrafuvasak və Nikola Tsolov izləyirdi.

Tsolov radio ilə komandaya önündə gedən pilotların tras limitlərini pozduğunu bildirib. Stüardlar dərhal Noel Leon və Aleks Danna 5 saniyəlik cəza veriblər.

Bu qərar Tsolova podium şansı yaradıb. İlk beşliyi həmin anda bağlasa da, cəzalar onun xeyrinə işləyib. Maraqlıdır ki, həftəsonu ərzində çoxsaylı problemlərlə üzləşən Qabriyele Mini də 14-cü yerdən start almasına baxmayaraq altıncı yerə qədər yüksələ bilib.

Yarışın son dəqiqələrində yüngül yağış başlasa da, hadisələrin gedişinə ciddi təsir göstərməyib. Pilotlar daha çox finişə problemsiz çatmağa üstünlük veriblər.

Yarış vaxt limiti səbəbindən 25 deyil, 21 dövrədən sonra başa çatıb.

Rafael Kamara mövsümdə ikinci qələbəsini qazanıb. Bununla da Invicta Racing komandası Spa trasında ardıcıl dördüncü mövsümdə qələbə əldə edib.

Rəqiblərinin cəzaları sayəsində Tasanapol İntrafuvasak ikinci yerə yüksələrək Formula 2 tarixində podiuma çıxan ilk tailandlı pilot olub. Eyni səbəbdən Nikola Tsolov da iki pillə irəliləyərək yarışı podiumda başa vurub və çempionatdakı liderliyini daha da möhkəmləndirib.

Cəza alan Aleks Dann yekunda dördüncü olub. Qabriyele Mini isə beşinci yeri tutaraq mümkün itkilərini minimuma endirib. Buna baxmayaraq, Kamara çempionatda Mini ilə fərqi 9 xala qədər azaldıb.