Ferrari-nin həm ötən mövsüm, həm də bu il yaşadığı əyləc problemləri paddokda ən çox müzakirə olunan mövzulardan biri olaraq qalır. Şarl Lekler xüsusilə Monreal və Monakoda yaşadığı problemlərdən sonra bu həftəsonu İspaniyada Brembo disklərini Carbon Industrie məhsulları ilə əvəz edəcək.
Komanda yoldaşı Lyuis Həmilton isə mart ayında keçirilən Yaponiya Qran Prisindən etibarən həmin disklərdən istifadə edir. Həmin vaxt Lekler də bu variantı sınaqdan keçirsə də, Brembo ilə davam etməyə üstünlük vermişdi. Lakin İspaniya həftəsonunda bu qərarını dəyişib.
Brembo Ferrari-nin rəsmi tərəfdaşı olaraq qalır və əyləc sisteminin digər komponentlərini təchiz etməyə davam edir. Bununla belə, pilotların əyləc pedalında axtardığı hissiyat tamamilə fərdi məsələdir və komandaların fərqli disk təchizatçılarına üstünlük verməsi avtoidmanda geniş yayılmış təcrübədir.
Qeri Anderson öz texniki təcrübəsinə əsaslanaraq bildirib ki, Brembo və Carbon Industrie müxtəlif şəraitlərdə fərqli xüsusiyyətlər nümayiş etdirirlər. Onun sözlərinə görə, son illərdə aradakı fərqlər azalsa da, hər iki markanın özünəməxsus üstünlükləri qalmaqdadır.
Brembo
- İdeal iş temperaturu diapazonu təxminən 200°C ilə 900°C arasındadır.
- Temperatur bu həddi aşdıqda disk və əyləc bəndlərinin aşınması sürətlə artır.
- Bunun qarşısını almaq üçün daha böyük soyutma kanallarına ehtiyac yaranır ki, bu da bolidin aerodinamik səmərəliliyinə mənfi təsir göstərə bilər.
- İlk sürətli dövrələrdə və ya təhlükəsizlik avtomobili dövrələrindən sonra ilk əyləcləmə nöqtəsində daha sabit və etibarlı hissiyat təqdim edir.
- Əyləc pedalına daha yumşaq və mərhələli şəkildə basan pilotlar üçün daha uyğundur.
- Monako və Sinqapur kimi əyləc enerjisinin nisbətən aşağı olduğu traslarda üstünlük təmin edir.
Andersonun fikrincə, Monakonun əsas çətinliyi bir dövrə ərzində çoxlu sayda qısa əyləcləmə nöqtələrinin olması və disklərin soyumasına imkan verən uzun düzlüklərin çatışmamasıdır. Nəticədə əyləc temperaturları sürücünün hiss etmədən yavaş-yavaş yüksələ bilir.
Carbon Industrie
- İdeal iş temperaturu diapazonu 350°C ilə 1200°C arasında dəyişir.
- Əyləc sisteminin həddindən artıq aşınma riski olmadan daha kiçik soyutma kanallarından istifadə etməyə imkan verir ki, bu da aerodinamik üstünlük qazandırır.
- Pilot sürətli dövrələrdə və formasiya dövrəsində disklərin və əyləc bəndlərinin temperaturunu yüksəltmək üçün daha aqressiv davranmalıdır.
- Əyləc pedalına ilk təmasda sərt və qəti şəkildə basan pilotlar üçün daha münasibdir.
- Monza və Monreal kimi yüksək əyləc enerjisi tələb edən traslarda daha effektiv işləyir.
Anderson qeyd edib ki, uzun düzlüklərə və sərt əyləcləmə nöqtələrinə malik traslarda əyləclər pedalın ilk basıldığı anda soyuq, əyləcdən çıxış zamanı isə çox isti ola bilər. Bu isə hər əyləcləmə zamanı bolidin balansının dəyişməsinə səbəb olur.
İki istehsalçı arasındakı fərqlər barədə danışan Anderson belə deyib:
“Əyləc materialı seçmək bəzən şirniyyat mağazasında açıq vitrinin qarşısında dayanmağa bənzəyir. Keçmişdə biz də məhz belə etmişdik: bir istehsalçının disklərindən, digərinin isə əyləc bəndlərindən istifadə etmişdik.
Bu üsulla iki istehsalçı arasındakı fərqi azalda və komponentlərdən ən azı birində yaranan həddindən artıq aşınma problemini müəyyən qədər aradan qaldıra bilərsiniz.
Texniki baxımdan düşünürəm ki, Brembo əslində Leklerin sürüş tərzinə, Carbon Industrie isə Həmiltonun üslubuna daha uyğundur.
Bu səbəbdən həftəsonu ərzində, xüsusilə təhlükəsizlik avtomobili dövrələrindən sonra və sıralama turundan əvvəlki isinmə dövrələrində onların əyləcləri necə idarə etdiklərini diqqətlə izləyəcəyəm.
Çünki pilotun sağ və ya sol ayağının altında hiss etdiyi şey onun özünəinamı üçün həyati əhəmiyyət daşıyır. Sağ ayaq qaz pedalındakı güc ötürülməsini idarə edir ki, yeni qaydalar fonunda bu ayrıca müzakirə mövzusudur. Sol ayaq isə tamamilə əyləc hissiyatından asılıdır”.
Şərh əlavə et