Barselona F2: Kamaradan növbəti poul!

Lakin sıralanma turunda ilk ciddi nəticəni gənc seriyanın debütantlarından olan Kolton Herta göstərib. Mövsümün əvvəlindən işləri istədiyi kimi getməyən amerikalı sürücü üçün Formula 1-də Cadillac ilə keçirdiyi ilk sərbəst yürüş sessiyası faydalı olub. Hitech komandasının Dallara bolidinə əyləşən Herta dərhal sürətli temp nümayiş etdirib.

Sessiyanın əvvəlində vurduğu 1:25.387 nəticəsi uzun müddət lider olaraq qalıb və heç kim onu keçə bilməyib. Görünür, sürücülər öz potensiallarını erkən mərhələdə göstərməyə tələsməyiblər. Sessiyanın ortalarına yaxın Monako yarışının qalibi Nikola Tsolov yarım saniyə daha sürətli dövrə vurub. Ardınca Rafael Kamara nəticəni daha 0,4 saniyə yaxşılaşdıraraq 1:24.810 göstəricisi ilə liderliyə yüksəlib.

Sıralanma turunun üçdə ikisi geridə qaldıqdan sonra sürücülər yeni Soft təkərlər üçün boksa dönərək son on dəqiqədə poul uğrunda mübarizəni davam etdirməyə hazırlaşıblar. Bu vaxt çempionatın lideri Qabriel Mini diqqət çəkmirdi. Onun doqquzuncu nəticəsi Kamaradan 0.8 saniyədən çox geri qalırdı və italyan sürücünün sessiyanın sonunda sürətini artıracağı gözlənilirdi.

Sessiyanın bitməsinə təxminən altı dəqiqə qalmış sürücülər yenidən trasa çıxıblar. Həqiqətən də Qabriel Mini, Aleks Dann, Coşua Dürksen və Rafael Villaqomes sürətlərini artıraraq ilk beşliyə yüksəliblər. Lakin heç biri Kamaranın vaxtını keçə bilməyib.

Sessiyanın bitməsinə 3 dəqiqə 41 saniyə qalmış Ritomo Miyatanın son döngədə qəza etməsi səbəbindən qırmızı bayraqlar göstərilib. Hitech sürücüsünün bolidi ciddi zədələnib və marşallar həm maşının təxliyəsi, həm də baryerlərin bərpası ilə məşğul olublar. Xoşbəxtlikdən yapon sürücü xəsarət almayıb.

Sürücülər və komandalar pit-leynə qayıdaraq sessiyanın bərpasını gözləyiblər. Bu vaxt stüardlar müxtəlif insidentləri araşdırır və mümkün cəzaları nəzərdən keçirirdilər.

Yerli vaxtla saat 16:30-da yaşıl işıq yandırılıb və sürücülər yenidən trasa çıxıblar. Xüsusilə nəticəsini yaxşılaşdırmaq istəyənlər buna tələsib. Həmin anda artıq səkkizinci yerə düşmüş Kolton Herta da onların arasında olub, lakin mövqeyini yaxşılaşdıra bilməyib.

Rafael Kamara isə ümumiyyətlə sessiyanı davam etdirməyib. İlk beşlikdə qərarlaşan digər sürücülər kimi o da nəticəsinin qorunacağına inanıb. Bu qərar özünü doğruldub.

Beləliklə, Monakoda olduğu kimi, poul mövqeyi və buna görə verilən iki bonus xal Invicta Racing sürücüsü Rafael Kamaraya qismət olub. Braziliyalı pilot hazırda çempionatda yeddinci pillədə qərarlaşıb.

Bazar günü keçiriləcək əsas yarışa Coşua Dürksen ikinci yerdən başlayacaq. İkinci sırada Aleks Dann və Qabriel Mini, üçüncü sırada isə Rafael Villaqomes və Nikola Tsolov yer alacaqlar.

Kolton Hertanın səkkizinci yeri isə onun Formula 2 karyerasındakı ən yaxşı sıralanma nəticəsi olub.

Şənbə günü keçiriləcək sprint yarışına isə poul mövqeyindən Campos Racing sürücüsü Noel Leon start verəcək. Meksikalı pilot Monakodakı sprint yarışını da məhz poul mövqeyindən başlayaraq qazanmışdı. Barselonada ötmə etmək Monakodakı qədər çətin olmasa da, burada da rəqibləri geridə saxlamaq asan deyil. Sprint yarışının necə keçəcəyini isə çox gözləməyə ehtiyac qalmayıb.