Bu həftəsonu Formula 1 mövsümün yeddinci mərhələsi üçün yenidən Barselonaya yollanacaq. Yarış artıq şəhərin və muxtar bölgənin adını daşıyır. İspaniya Qran Prisinə gəlincə, bu ildən etibarən həmin yarış Madriddə keçiriləcək və ilk yarışın sentyabr ayında təşkili planlaşdırılır. Bundan əlavə, Barselona mərhələsi bu dəfə ənənəvi təqvimlə müqayisədə bir neçə həftə daha gec baş tutur.
Pirelli Barselonaya C2 (Hard), C3 (Medium) və C4 (Soft) tərkiblərini gətirəcək. Bu seçim adətən İspaniya trası üçün istifadə edilən variantdan bir pillə daha yumşaqdır. Şirkət hesab edir ki, belə seçim yarış strategiyalarının sayını artıracaq, pit stopların çoxalmasına şərait yaradacaq və sərt tərkibli təkərlərin daha geniş istifadəsinə imkan verəcək.
Barselona trası haqlı olaraq çempionatın ən universal traslarından biri hesab olunur. Trasın uzunluğu 4657 metrdir və konfiqurasiya uzun düzlüklərlə yanaşı, bir çoxu yüksək sürətlə keçilən 14 döngəni özündə birləşdirir.
Təkərlər xüsusilə yan yüklənmələrə məruz qalır. Bunun əsas səbəbi dövrə ərzində doqquz sağ döngənin olmasıdır. Bu baxımdan ən tələbkar hissələr üçüncü döngə və 2023-cü ildə yenidən qurulan son sektor hesab olunur. Həmin dəyişiklik start-finiş düzülüyünə çıxışı daha axıcı edib.
Barselonada təkərlər üçün əsas problem qızmadan çox həddindən artıq istiləşmədir. Aşınmada olduğu kimi, əsas yük ön təkərlərin üzərinə düşür. Bundan əlavə, kifayət qədər köhnə və yüksək abrazivliyə malik asfalt da təkərlərə əlavə yük yaradır. Mərhələnin bu il daha gec tarixdə keçirilməsi səbəbindən tras temperaturunun əvvəlki illərlə müqayisədə daha yüksək olacağı da nəzərə alınmalıdır.
Barselonada komandaların gətirəcəyi yeniliklər də xüsusi maraq doğurur. Ənənəvi olaraq bu mərhələ bolidlərin yenilənməsi baxımından mövsümün ən vacib yarışlarından biri hesab edilir. Dəyişikliklər hətta təkər disklərinə qədər uzana bilər. Çünki disklər asfalt, təkərlər və əyləclər arasında istilik mübadiləsinə birbaşa təsir göstərir.
Yarış həftəsonundan sonra Pirelli daha iki gün Barselonada qalacaq. İyunun 16 və 17-də trasda 2027-ci il mövsümü üçün nəzərdə tutulmuş prototip təkərlərin testləri keçiriləcək. Test proqramında Ferrari, Aston Martin və Cadillac komandaları iştirak edəcəklər.
Şərh əlavə et