İtaliya şirkəti yumşaq tərkibli təkərlərin performansından da razı qalıb.
Dario Marrafuski: “Monakodakı həftəsonu təqvimdəki digər yarışlardan fərqlənir. Burada şənbə günü keçirilən sıralanma turu çox vaxt bazar günü yarışının nəticəsini müəyyənləşdirir. Çünki bu trasda ötmə etmək olduqca çətindir.
Bu gün ən yaxşı nəticə göstərən sürücülər artıq müəyyən üstünlük əldə ediblər və komandaların seçəcəyi taktika variantından asılı olmayaraq bu üstünlük onların əlində olacaq.
Monako küçələrində təkərlərin yeyilməsi ənənəvi olaraq aşağı səviyyədə olur. Bu səbəbdən iki fərqli tərkibdən istifadə tələbinə əməl etmək üçün yarış məsafəsini bir pit-stopla başa vurmaq mümkündür.
Müxtəlif taktiki ssenarilərdə hər üç təkər tərkibindən fərqli kombinasiyalarda istifadə edilə bilər və onların effektivliyi bir-birinə kifayət qədər yaxındır. Məsələn, bəzi variantlarda sürücülər Soft və ya Medium təkərlərlə start alaraq yarışın son hissəsini Hard təkərlərlə keçirə bilərlər. Bu halda pit-stop Soft-la start verənlər üçün 29-35-ci, Medium-la start verənlər üçün isə 33-39-cu dövrələr arasında baş tuta bilər.
Bununla belə, hesab edirik ki, komandalar daha yaxşı ilişmə təmin edən iki yumşaq tərkibə üstünlük verəcəklər.
Monrealda və bu gün Monakoda C5 təkərlərinin geniş istifadəsi komandaların kifayət qədər məlumat toplamasına imkan verməli idi. Bu məlumatlar bugünkü yarışın taktikasını müəyyənləşdirərkən nəzərə alınacaq. Soft təkərlər startda daha effektiv ilişmə təmin edir, daha sonra isə 31-37-ci dövrələr arasında Medium təkərlərə keçmək mümkündür.
Ancaq bütün taktiki hesablamalara baxmayaraq, qırmızı bayraqların göstərilməsi və ya təhlükəsizlik avtomobilinin trasa çıxması pit-stop vaxtına ciddi təsir göstərə bilər. İki il əvvəl ilk dövrədə baş verən qəzanı xatırlamaq kifayətdir. Həmin hadisə bütün sürücüləri dərhal boksa qayıtmağa məcbur etmişdi və əksər iştirakçılar üçün bu, yarışdakı yeganə pit-stop olmuşdu”.
Şərh əlavə et