Elektrik istifadəsi məhdudlaşdırılır?

İtaliyanın AutoRacer nəşrinin yaydığı məlumatlara əsasən, müzakirələrin mərkəzində güc qurğularının elektrik hissəsi dayanır. Mövsümün ortasında daxiliyanma mühərriyində dəyişiklik etmək demək olar ki, mümkün olmadığından, əsas həll yolu elektrik sistemləri üzərindən axtarılır.

Məqsəd hazırda təxminən 50:50 olan güc bölgüsünü dəyişərək daha çox enerjinin daxiliyanma mühərriyindən gəlməsini təmin etməkdir.

Ən vacib təkliflərdən biri MGU-K sisteminin maksimum gücünün azaldılmasıdır. Hazırda 350 kVt olan bu göstəricinin 300 kVt və daha aşağı səviyyəyə endirilməsi müzakirə olunur və FIA bu ideyaya müsbət yanaşır. Bu dəyişikliyin nəticəsində bolidlər bir qədər yavaşlasa da, elektrik enerjisinin dövrə boyu daha balanslı istifadə ediləcəyi düşünülür.

Lakin bu yanaşma hamı tərəfindən dəstəklənmir. Xüsusilə 250 və ya 200 kVt kimi kəskin azalmalar bəzi komandalar tərəfindən həddindən artıq radikal hesab olunur. Ən böyük ehtiyatlı mövqe isə kommersiya hüquqlarının sahibi olan Liberty Media-dan gəlir – onlar yalnız məhdud dəyişikliklərə razıdırlar.

Daha az mübahisə doğuran digər məsələ enerji geri qazanımının azaldılmasıdır. Hazırda dövrə başına 9 MJ olan limitin təxminən 6 MJ-ə endirilməsi təklif olunur.

Bu dəyişiklik də bolidləri müəyyən qədər yavaşlatsa da, mühüm təsirlər yarada bilər. Enerji geri qazanımının azalması ilə “lift and coast” (qazı buraxaraq süzülmə) və düzlüklərin sonunda sürətin azaldılması kimi sürüş texnikalarının daha az istifadə olunacağı gözlənilir. Bu isə pilotlara xüsusilə sıralama turlarında daha aqressiv və təbii sürüş imkanı verəcək.

Eyni zamanda bu addımın təhlükəsizliyə də müsbət təsir göstərəcəyi düşünülür. Fərqli enerji istifadə fazalarından yaranan böyük sürət fərqlərinin azalması trasdakı riskləri də aşağı sala bilər.

Müzakirəyə çıxarılan digər təklif isə sıralanma və yarış üçün fərqli elektrik gücü limitlərinin tətbiqidir. Lakin komandalar buna qarşı çıxırlar. Səbəb isə qapalı park qaydaları çərçivəsində bu cür dəyişikliklərin texniki və əməliyyat baxımından çətinlik yaratmasıdır.

Hələlik yekun qərar verilməyib. Ancaq mövcud vəziyyət göstərir ki, Formula 1-də radikal inqilabdan çox, mərhələli və hədəfə yönəlmiş dəyişikliklər həyata keçiriləcək.