Komandalar hər sessiyada üstünlük qazanmaq üçün müxtəlif üsullara əl atırlar. Lakin bu rəqabət xərclərin də artmasına səbəb olur. FIA isə komandaların xərclərini nəzarətdə saxlamaq və bu sahədə texniki inkişafı məhdudlaşdırmaq üçün yeni addımlar atır.
2027-ci il mövsümü üçün yenilənən texniki qaydalara əsasən, sıralanma turunda və yarışda fərqli xüsusiyyətlərə malik disklərdən istifadə qadağan ediləcək. Disklər qapalı park qaydaları çərçivəsində yalnız eyni xüsusiyyətlərə malik ekvivalent hissələrlə əvəz edilə bilən komponentlər siyahısına daxil edilib.
Bu mövsüm komandalar təkərlərin temperaturunu daha yaxşı idarə etmək məqsədilə müxtəlif disk dizaynlarını sınaqdan keçiriblər. Bəzi dizaynlar təkərlərin sıralanma turunda optimal temperatura daha tez çatmasına kömək edirdisə, digərləri yarış ərzində təkərlərin performansını daha uzun müddət qorumağa imkan verirdi.
Lakin FIA bu sahədə texniki təkmilləşdirmələrin komandalar arasındakı xərc fərqini daha da artıracağından narahatdır. Yeni qaydalarla federasiya məhz bu cür fərqli yanaşmaların qarşısını almağı hədəfləyir.
Beləliklə, 2027-ci ildən komandalar sıralanma turu ilə yarış arasında fərqli disk versiyalarından istifadə edərək üstünlük qazana bilməyəcəklər. Disk seçimi həm vahid dövrədə sürət, həm də yarış tempi nəzərə alınmaqla daha erkən mərhələdə müəyyənləşdirilməli olacaq.
Şərh əlavə et