Bəhreyndəki testlər zamanı FIA bu narahatlıqlara reaksiya verərək, start anından əvvəlki 10 saniyəlik məcburi gözləmə müddətinə əlavə 5 saniyə artırıb. Həmin mərhələdə sürücülər turbini məcburi şəkildə fırlatmalı olurlar ki, start zamanı “turbo boşluğu” (turbo lag) problemi yaşanmasın.
Lakin dəyişikliklər bununla bitməyib. Artıq start zamanı və birinci döngəyə qədər sürətlənmə mərhələsində Straight Mode rejimindən istifadə qadağan ediləcək. Bu rejimdə ön və arxa qanadın hərəkətli elementləri demək olar ki, üfüqi vəziyyətə gətirilir və hava müqaviməti minimuma endirilir.
Əvvəlcə buna icazə verilmişdi, ancaq Oskar Piastri ümumi narahatlığı belə ifadə edib: “22 maşın eyni anda start alırsa və onların qanadları daha az asfaltayatma qüvvəsi yaradırsa, məncə bu, birbaşa fəlakət reseptidir”.
Məlumata görə, komandalar artıq qaydalara dəyişiklik edilməsinə razılıq veriblər və yeniliklər Avstraliya Qran-Prisinə qədər qüvvəyə minməlidir.
Andrea Stella, McLaren komandasının rəhbəri, vəziyyəti belə şərh edib: “Start zamanı və birinci döngəyə qədər sürətlənmə mərhələsində Straight Mode-un istifadə olunmayacağı ilə bağlı, düşünürəm ki, hamı razılığa gəlib. Hərçənd bu qərar hələ FIA tərəfindən rəsmi şəkildə təsdiqlənməlidir, amma bildiyimə görə ümumi razılaşma artıq var”.
Bəhreyndə start məşqləri zamanı da aydın görünürdü ki, bütün maşınlarda qanadların hücum bucağı maksimum səviyyədə saxlanılırdı. Bu isə o deməkdir ki, komandalar artıq təhlükəsizliyə üstünlük verməyə başlayıblar və 2026-cı ilin ilk yarışında start proseduru əvvəlki illərdən fərqli olacaq.
Şərh əlavə et