Lekler qış tesrlərini zirvədə bitirib

2026-cı ildə qış test proqramı 2016-cı ildən bəri ən uzunmüddətli olub. Ümumilikdə doqquz test günü keçirilib – yanvarda Barselonada icazə verilmiş beş gündən üçü və fevralda Bəhreyndə altı gün. Məqsəd Formula 1-in müasir tarixində ən böyük reqlament dəyişiklikləri ilə üzləşən komandaların adaptasiyasına kömək etmək idi.

Ümumilikdə testlər 2014-cü ildə hibrid güc qurğularına keçid dövrü ilə müqayisədə (o zaman 12 gün test olmuşdu) daha sakit keçib, lakin hər gün, o cümlədən son gündə də nasazlıqlardan yan keçmək mümkün olmayıb. Heç bir komanda testləri problemsiz başa vura bilməyib.

Mercedes və Ferrari mühərriklərinə sahib komandalar bir qədər stabil görünüb, lakin bu o demək deyil ki, onların problemi olmayıb. Son gün Kimi Antonelli güc qurğusunun sıradan çıxması səbəbindən trasda dayanıb və aqreqat dəyişdirilməli olub. Günorta saatlarında McLaren-in boksları qarşısında da qoruyucu baryerlər qurulmuşdu.

Ən çətin vəziyyət isə Aston Martin üçün olub. Honda-nın güc qurğusundakı davamlı nasazlıqlar Adrian Nyui tərəfindən hazırlanmış yeni maşına ciddi məsafə qət etməyə imkan verməyib. Son gün ümumiyyətlə trasa çıxmayıblar, çünki bir gün əvvəl sıradan çıxmış Honda batareyasını əvəz etməyə ehtiyat hissə tapılmayıb. Yaponiyalı motor istehsalçıları hətta rəsmi açıqlama da yayıblar. Halbuki iki həftə əvvəl onlardan möcüzə gözlənilirdi, indi isə komanda mövsümə hətta debütantlardan bir neçə addım geri başlayacaq kimi görünür.

Axşama doğru tras soyuyub, ilişmə maksimum səviyyəyə çatıb. Bəzi sürücülər kvalifikasiya cəhdlərini son saata saxlayıblar, lakin real sürəti göstərməyə tələsməyənlər də az olmayıb. Bununla da, mövsümün əvvəlində qüvvələr nisbətini yalnız Melburndakı sıralama turundan sonra dəqiq qiymətləndirmək mümkün olacaq.

Günün və ümumilikdə iki həftəlik Bəhreyn testlərinin ən yaxşı nəticəsini Şarl Lekler göstərib. Monakolu sürücü dövrəni 1:31.992 nəticə ilə tamamlayıb.

Bununla da qış testləri başa çatıb. Komandalar növbəti dəfə düz iki həftə sonra  Melburnda ilk sərbəst yürüşlərdə trasa çıxacaq. Gözləmək üçün çox vaxt qalmayıb.