Formula 1 1993-cü ildən bəri ilk dəfə 2030-cu illərin əvvəlində Afrika qitəsinə qayıtmağı planlaşdırır. Növbəti onillik ərzində Ruandada yarışın təşkili və onun təqvimə daxil edilməsi hədəflənir.
Yeddiqat dünya çempionu Lyuis Həmilton daha əvvəl Formula 1 Afrikada yarış keçirmədən karyerasını başa vurmaq istəmədiyini bildirmişdi.
Təqvimə əsasən, Həmilton 2030-cu ilin yanvarında 45 yaşına çatacaq. Onun keçmiş rəqibi Fernando Alonso isə hazırda 45 yaşındadır və 2027-ci il mövsümünün ortalarında 46 yaşını qeyd edəcək.
106 qələbə, 104 poul mövqeyi və 208 podiumla Formula 1 tarixinin statistik baxımdan ən uğurlu pilotu olan Həmilton 2030-cu ilin sonuna qədər fasiləsiz yarışmağa və təqvimdəki bütün mərhələlərdə iştirak etməyə davam etsə, karyerasında 500 Qran-pri startına yaxınlaşacaq.
Formula 1-də 399-cu yarışına çıxmağa hazırlaşan Həmilton Ruandada keçiriləcək ilk yarışda iştirak edib-etməyəcəyi ilə bağlı suala iddialı cavab verib:
Lyuis Həmilton: “Əvvəla, Formula 1-in 70 illik tarixində mənim kimisi olmayıb. Buna görə də fərqli xüsusiyyətlərə sahib olduğumu düşünürəm.
Əlbəttə, yaş artdıqca qarşıma hazırda proqnozlaşdıra bilmədiyim çətinliklər çıxa bilər. Amma bu yol boyunca reaksiya müddətimin yavaşlayacağı kimi bir çox qərəzli fikirlərlə qarşılaşmışam.
Ötən yarışdakı reaksiyamı gördünüz? Reaksiya müddətim buradakı ən gənc pilotlardan bəzilərindən daha sürətlidir. Özünüzü və zehninizi iti saxlamaq üçün istifadə edə biləcəyiniz çoxlu üsullar var.
Məncə, əsas məsələ hər şeydən keçməyə hazır olmaqdır. Hazırda bunu edirəm. Dörd il sonra da eyni şeyi etmək istəyib-istəməyəcəyimi deyə bilmərəm. Amma indiki işimi hələ də çox sevirəm. 44 yaşımda 20 yaşlı pilotla rəqabət aparıb-apara bilməyəcəyimi kim bilə bilər? Ancaq 41 yaşımda bunu bacarıram. 2030-cu illərdə hələ də burada olub-olmayacağımı zaman göstərəcək”.
Həmilton karyerasını nə vaxt başa vuracağı ilə bağlı qərarında əsas meyarın öz performansı olacağını da vurğulayıb: “Performansım artıq kifayət etmədiyi halda burada qalaraq insanların mənə göstərdiyi xoş münasibətin həddini aşmaq istəmirəm.
Bolid idarə edərkən performansımın ciddi şəkildə aşağı düşməsini, reaksiyalarımın yavaşlamasını, sürücülük keyfiyyətimin və sürətimin geriləməsini görmək istəmirəm. Ötən il hamı bunu gördüyünü düşünürdü, ancaq mən hər kəsin yanıldığını sübut etdim və bunu davam etdirəcəyəm”.
Şərh əlavə et