Start siqnalının verilməsi ilə başlayan sessiyada ilk dəqiqələrdən etibarən sürücülər sürətlərini artırmağa çalışıblar. Cek Miller trasa çıxan kimi sürüşərək çınqıl zonasına düşüb və hadisədən sonra qısa müddətə sarı bayraqlar göstərilib.
İlk 5 dəqiqənin sonunda Bezzekki 1:34.381-lik nəticə ilə tempi müəyyənləşdirib. İtalyan sürücü daha sonra dövrəsini yaxşılaşdıraraq 1:32.644 nəticə göstərib.
Sessiyanın ilk 10 dəqiqəsi geridə qalanda Bezzekki yenidən ən sürətli dövrəni vuraraq 1:32.025 nəticə ilə liderliyini möhkəmləndirib. Aleks Markes isə 1:32.066-lıq nəticə ilə ikinci pilləyə yüksəlib.
Pedro Akosta 1-ci döngədə tarazlığını itirərək çınqıl zonasına çıxıb. Bu hadisə səbəbindən yenidən qısa müddətə sarı bayraqlar göstərilib.
Sessiyanın 15-ci dəqiqəsindən sonra sürücülərin əksəriyyəti sazlama üzərində işləmək üçün boksa qayıdıb. Daha sonra trasa çıxan Bezzekki sürətli dövrəsini bir qədər də yaxşılaşdıraraq 1:31.988 nəticə ilə liderliyini qoruyub.
Sessiyanın sonlarına doğru Mark Markes 1:32.162-lik nəticə ilə üçüncü pilləyə yüksəlib. Lakin növbəti sürətli dövrəsində 1:31.680 nəticə göstərərək liderliyi ələ keçirib.
Luka Marini də tempini artıraraq 1:31.991-lik nəticə göstərib və üçüncü pilləyə yüksəlib.
Sessiyanın son 5 dəqiqəsində təmsilçimiz Toprak Rəzqatlıoğlu 1:32.690-lıq dövrə ilə 15-ci pilləyə yerləşib.
Son 3 dəqiqəyə 1:31.647-lik nəticə ilə daxil olan Bezzekki yenidən ən sürətli dövrəni vuraraq liderliyi Markesdən geri alıb. Ardınca Yohann Zarko 1:31.650-lik nəticə ilə ikinci, Akosta isə 1:31.678-lə üçüncü pilləyə yüksəlib.
Sessiyanın son saniyələri isə böyük dəyişikliklərə səbəb olub. Bezzekki 1:31.528-lik nəticə ilə liderliyə yüksəlsə də, Mark Markes 1:31.468-lik dövrə vuraraq son anda ən sürətli sürücü olub.
Beləliklə, San Marino Qran Prisinin ilk sərbəst məşq sessiyasını Mark Markes lider, Marko Bezzekki ikinci, Raul Fernandes isə üçüncü pillədə tamamlayıb.
Şərh əlavə et