Şənbə günü Monakoda sıralanma turunun son dəqiqələrində nəfəs kəsən mübarizə yaşanıb və Kimi Antonelli Maks Ferstappeni 0,043 saniyə qabaqlayaraq poul mövqeyinin sahibi olub.
Bu uğurda cümə gecəsi aparılan genişmiqyaslı sazlanma dəyişiklikləri də daxil olmaqla bir çox amil rol oynasa da, komanda arxa qanaddan əldə edilən kiçik üstünlüklərin yekun nəticəni müəyyənləşdirmiş ola biləcəyini anlayıb.
Mercedes təhlükəsizlik səbəbindən Monte-Karlo küçə trasında tətbiq olunan aktiv aerodinamika qadağasını fürsətə çevirən komandalardan biri olub. Düzlüklərdə qanadın açılmasını təmin edən standart mexanizmlərə ehtiyac qalmadığından komandalar qaydaların icazə verdiyi çərçivədə həmin hissəyə mürəkkəb quruluşlu kiçik qanadcıqlar yerləşdiriblər.
Komandadakı mənbələrin bildirdiyinə görə, Mercedes-in bu xüsusi həllindən gözlənilən dövrə vaxtı qazancı təxminən 0,045-0,05 saniyə olub. Bu göstərici Antonelli ilə Ferstappen arasında sessiyanın sonunda yaranan 0,043 saniyəlik fərqə çox yaxındır.
Oxşar şəkildə Red Bull-un da öz kiçik qanadcıqlarını hazırladığı düşünüldüyündən, Mercedes bu addımı atmasaydı, sıralama turu onun əleyhinə nəticələnə bilərdi.
Bu texniki detal sıralanma turunu üçüncü yerdə başa vuran Lyuis Həmiltonun da diqqətindən yayınmayıb. Əfsanəvi sürücü bildirib ki, cümə gününü ilk iki pillədə tamamlayaraq həftəsonunun favoriti kimi görünən, lakin sıralanma turunda geri qalan Ferrari oxşar həllə üstünlük verməməklə fürsəti əldən verib.
Həmilton qeyd edib ki, onlar cümə axşamı trasa çıxdıqları zaman digər komandaların qanadlarındakı bu xüsusi əlavələri görüblər və öz maşınlarında bunun olmamasına bir qədər təəccübləniblər.
Arxa qanad əlavəsi poulun qazanılmasında mühüm rol oynasa da, Mercedes-in şənbə günü etdiyi sazlanma dəyişiklikləri də performansa birbaşa təsir göstərib. Cümə günü keçirilən məşqlərdə həm Antonelli, həm də komanda yoldaşı Corc Rassell nahamar hissələrdə ciddi problemlər yaşayıb və son sektorda arxa təkərləri həddindən artıq qızdırıblar.
Texniki heyət Brekli bazasındakı simulyator vasitəsilə cümə gecəsi intensiv iş apararaq mexaniki sazlamalarda köklü dəyişikliklər edib. Sıralanma turundan sonra danışan Kimi Antonelli cümə gününün çətinliklərini və sonrakı dönüşü belə izah edib: “Yalan danışmayacağam, dünən kifayət qədər çətinlik çəkirdik.
Lakin komanda cümə gecəsi zavoddakı simulyator məlumatlarını trasdakı nəticələrimizlə müqayisə etməkdə əla iş gördü və sazlanmalarda böyük dəyişikliklər etdi.
Bu səhər maşın özünü xeyli daha canlı hiss etdirirdi. Bundan başqa, nahamar hissələrdə və bordür keçidlərində daha yumşaq və daha dözümlü idi.
Bu dəyişikliklər dünəndən bu günə performans baxımından çox böyük qazanc əldə etməyimizə və poul uğrunda mübarizə aparmağımıza imkan verdi”.
Bu struktur dəyişikliklərinin əsas məqsədi maşının davranışını yumşaltmaq və pilotların kerblərə daha aqressiv hücum etməsinə şərait yaratmaq olub.
Lakin ən vacib addım ön və arxa hissələr arasındakı təkər temperaturlarını tarazlaşdırmaq üçün mexaniki balansın yenidən qurulması idi. Bunun sayəsində W17 bütün dövrə ərzində təkərləri ideal iş temperaturunda saxlaya bilib.
Bu mexaniki yeniliklər Antonellinin hazırlıq dövrələrini düzgün idarə etməsi və yüksələn temperatur fonunda azalan tras tutuşuna uyğunlaşması ilə birləşərək Mercedes-ə poul mövqeyi qazandırıb.
Şərh əlavə et