Mayami həftəsonu sprint formatında təşkil olunacaq və bu, komandalar üçün əlavə başağrısı deməkdir. Cəmi bir sərbəst yürüş sessiyasından sonra sıralama və sprint yarışı gələcək, bu da mühəndislərə bolidləri ideal sazlamaq üçün çox az vaxt verəcək. Qısaca desək, burada səhv etmək lüks yox, birbaşa cəza olacaq.
Yeni reqlament fonunda isə vəziyyət daha da mürəkkəbləşir. Güc qurğularının enerji idarəetməsi, batareya istifadəsi və düzlüklərdə sürət strategiyası Mayamidə əsas rol oynayacaq. Bu trasda uzun düzlüklər olduğu üçün komandalar həm maksimal sürət, həm də enerji balansı arasında incə xətt tapmalı olacaq.
Sprint yarışı isə əsas Qran Priyə bir növ öngörüş rolunu oynayacaq. Amma bu öngörüş bəzən filmin özündən daha dramatik olur.
Hava şəraiti də yenə diqqət mərkəzində olacaq. Mayamidə gözlənilən dəyişkən hava komandaların strategiyasını alt-üst edə bilər. Quru tras üçün qurulan plan bir anda yağışla mənasını itirə bilər və burada improvizasiya bacarığı ön plana çıxacaq.
Mayami bu mövsüm Formula 1-in “imtahan zalı” olacaq. Burada təkcə sürücülər yox, mühəndislər, strateqlər və hətta komanda körpüsündəki hər qərar sınaqdan keçəcək. Sprint formatı isə bu imtahanın “test versiyası” kimi çıxış edəcək, kim hazırdır, kim hələ də cavabları axtarır, hamısı üzə çıxacaq.
Əgər əvvəlki illərdə komandalar həftəsonuna planla gəlirdisə, indi planlar daha çox ehtimallar üzərində qurulacaq. Mayamidə qalib gəlmək üçün sadəcə sürətli olmaq kifayət etməyəcək. Belə ki, burada çevik düşünmək, riski düzgün bölmək və ən əsası, səhvləri minimuma endirmək lazım olacaq.
Bir sözlə, Mayami Qran Prisi hələ start götürmədən belə bizə bir mesaj verir: bu mövsümdə qaz pedalına basmaq asandır, ancaq onu nə vaxt buraxmalı olduğunu bilmək çempionları müəyyən edəcək.
Şərh əlavə et