ABŞ Qran Prisinə ev sahibliyi edən Circuit of the Americas trasının nahamar səthi pilotlar arasında fikir ayrılığına səbəb olub. Maks Ferstappen trasdakı çökəkliklərin yaratdığı fiziki yükdən və belində yaranan zədədən şikayətlənərək sərt tənqidlər səsləndirib. Yeddiqat dünya çempionu Lyuis Həmilton isə tamamilə fərqli mövqe sərgiləyib.
Trasdakı nahamarlığın sürüşə mübarizə və həyəcan qatdığını deyən Həmilton şikayətlənmək əvəzinə şəraitə uyğunlaşmağın vacibliyini vurğulayıb.
Həmiltonun sözlərinə görə, asfalt örtüyündəki nahamarlıqlar bolidə nəzarəti çətinləşdirir və pilotların sürücülük bacarıqlarını ön plana çıxarır. Britaniyalı pilot sıralanma turundan sonra belə danışıb: “Özümdən danışmalı olsam, bu çökəklikləri sevirəm. Onlar trasa özünəməxsus xarakter verir.
Bolidin altınızda sürüşdüyünü hiss etmək və daim ona nəzarət etməyə çalışmaq xoşuma gəlir. Bu mübarizəni sevirəm.
İdeal dünyada yaşasaydıq, tras tamamilə hamar olardı. Amma bu halda özünəməxsus xarakterini itirərdi. Bu trası fərqli edən məhz həmin çökəkliklərdir.
Birinci döngə bizim üçün qətiyyən problem deyil. 9-cu və 19-cu döngələrdə bir qədər nahamarlıq var, amma nəticədə hamımız eyni vəziyyətdəyik. İnsanlar dayanmadan şikayətlənirlər, amma mənim 41 yaşım var və onurğam tam sağlamdır”.
Yarışla bağlı gözləntilərini də bölüşən Həmilton sözlərini belə davam etdirib: “Həftəsonu ərzində düzlüklərdəki performansı təhlil etdik. Birinci döngəyə doğru batareya gücünü azaltdığımız anlarda Red Bull fərqi artırmağa davam edir.
11-ci və 12-ci döngələrə yaxınlaşarkən də oxşar vəziyyətlə qarşılaşırıq. Bunu məlumatlarda aydın şəkildə görmək mümkündür.
Açığı, bunun səbəbini tam bilmirəm. Bolidim mənə kifayət qədər yaxşı hiss etdirirdi və dövrəm də uğurlu alındı. Düşünürəm ki, onlar sadəcə daha sürətli idilər”.
Şərh əlavə et