Formula 1 idmanın ətraf mühitə təsirini minimuma endirməyi hədəfləyən “2030 Net Sıfır” strategiyası çərçivəsində daha bir mühüm mərhələni geridə qoyub. Seriya 2030-cu ilə qədər emissiyalarını 2018-ci ilin baza göstəriciləri ilə müqayisədə 50 faiz azaltmağı öhdəsinə götürmüşdü.
24 yarışdan ibarət sıx təqvim səbəbindən qaçılmaz olan emissiyalar üçün isə Formula 1 etibarlı karbon kompensasiyası proqramlarından istifadə etməyi planlaşdırır.
Karbon hesabatları üzrə ixtisaslaşmış Normative şirkəti tərəfindən təsdiqlənən son hesabata əsasən, Formula 1 əməliyyatlarının — fabriklər, yarış trasları və onlar arasındakı geniş logistika fəaliyyətləri daxil olmaqla — ümumi emissiyası 2025-ci ildə 148 805 ton karbon qazı ekvivalenti (tCO2e) təşkil edib. Bu göstərici 2024-cü ildəki 168 720 tCO2e ilə müqayisədə 11,8%-lik azalma deməkdir.
Formula 1 2018-ci ildə qeydə alınmış 228 793 tCO2e göstəricisi ilə müqayisədə son səkkiz il ərzində ümumi emissiyalarını 35% azaltmağa nail olub. Bu nəticələr qarşıdakı dörd il ərzində emissiyaların yarıya endirilməsi planının qrafikə uyğun davam etdiyini göstərir.
Hesabatda qeyd olunur ki, ən böyük irəliləyiş Formula 1 rəhbərliyinin və komandaların istifadə etdiyi fabrik və obyektlərin bərpa olunan enerji mənbələrinə keçməsi hesabına əldə olunub.
Bununla yanaşı, səyahət və logistika sahəsində emissiyaların azaldılması üçün bir sıra konkret addımlar atılıb:
* Sintetik aviasiya yanacağına yatırımlar əhəmiyyətli dərəcədə artırılıb;
* Uzaqdan əməliyyat modelləri genişləndirilib və yarışlara daşınan fiziki yükün həcmi azaldılıb;
* Komandaların logistika yük maşınlarında sintetik yanacaq istifadəsi yayğınlaşıb, dəniz daşımalarında isə ilk dəfə sintetik gəmiçilik yanacağına investisiyalar edilib;
* 2023-cü il Avstriya Qran-prisində keçirilən sınaqlardan sonra Avropadakı bütün yarışlarda paddokun enerji ehtiyacları günəş enerjisi və HVO (hidrogenlə emal olunmuş bitki mənşəli yanacaq) əsaslı bərpa olunan enerji sistemləri ilə təmin olunmağa başlanıb.
2026-cı ildən sonrakı dövr üçün Formula One Management (FOM) avadanlıqları daim Böyük Britaniyaya daşımaq əvəzinə regional logistika mərkəzlərində yerləşdirməyi planlaşdırır. 2030-cu ilə qədər hazırkı yayım və logistika avadanlıqlarının 50 faizinin hava nəqliyyatından tamamilə çıxarılması nəzərdə tutulur.
2026-cı ildən etibarən tətbiq olunan təqvim optimallaşdırılması çərçivəsində coğrafi baxımdan bir-birinə yaxın yarışlar ardıcıl keçiriləcək. Bu planın bir hissəsi olaraq Kanada və Mayami Qran Prilərinin ard-arda təşkili logistika baxımından əhəmiyyətli karbon qənaəti təmin edəcək.
Formula 1-in davamlı inkişaf üzrə rəhbəri Ellen Cons mövzu ilə bağlı bunları deyib: “Davamlılıq qəbul etdiyimiz hər qərarın əsasını təşkil edir.
Sintetik aviasiya yanacağına yatırımları iki dəfə artıraraq, dənizçilik yanacağı sahəsində ilk investisiyamızı edərək və təşkilatçılar, komandalar və tərəfdaşlarla sıx əməkdaşlıq quraraq emissiyaları azaltmağa davam edirik.
2030-cu il üçün müəyyən etdiyimiz Net Sıfır hədəfinə doğru irəlilədikcə, 2026-cı ildə tam tətbiq olunmağa başlayan təqvim optimallaşdırılması bizə daha böyük qazanclar gətirəcək.
Bütün bu addımlar göstərir ki, qlobal miqyasda sintetik əməliyyatlar yalnız mümkün deyil, eyni zamanda Formula 1-i xarakterizə edən performansdan, rəqabətdən və tamaşa dəyərindən güzəştə getmədən həyata keçirilə bilər”.
Şərh əlavə et