Kokpit.az bildirir ki, Ferrari-dən sonra Williams komandası yeni bolidinin təqdimat tarixini açıqlayıb. Britaniya komandası yeni bolidini Sevgililər Günündə – fevralın 14-də təqdim edəcək. Bu xüsusi təqdimat ilə Williams yeni FW47-ni müvəqqəti rəng çaları ilə ictimaiyyətə göstərəcək. Komandanın əsl rəng çalarını isə fevralın 18-də Londonda O2 Arenasındakı təqdimatda görəcəyik. Williams komandası da 14 fevraldakı rəng çalarının müvəqqəti olacağını təsdiqləyib.
Aleks Elbon komandanın gördüyü işlərdən təriflə danışıb: “Bazadakı hər kəs bolidimizi növbəti mövsümə hazırlamaq üçün əlindən gələni edir. 14 fevraldakı təqdimatla bizim üçün xüsusi mövsüm başlayacaq. Bu il mövsümün əvvəlindən güclü mübarizə aparmağı hədəfləyirik.
Bundan başqa 2026-cı ildə qarşımıza çıxacaq fürsətləri səbirsizliklə gözləyirik. Bu komandanın gördüyü işlər çox xüsusidir və bunun nəticəsini görmək üçün səbirsizlənirik”.
Komandanın yeni sürücüsü Karlos Sayns isə bunları deyib: “Bu, komanda üçün vacib dövrdür. Hamımız Williams komandasını zirvəyə qaytarmaq üçün əlimizdən gələnin ən yaxşısınl edirik.
Əbu Dabidəki mövsümsonu testlərində komandanın motivasiyası mənə doğrudan da təsir etdi. Bu uzun illərdən sonra gözəl görüntü idi və bunun hesabına yaxşı plan qurduq.
Artıq bolidimizin təqdimatına az vaxt qalır və yeni maşınımı görmək üçün səbirsizlənirəm. 2025-ci il həyəcanverici olacaq və güclü mövsüm keçirmək üçün qərarlıyıq. Vamos!”.
Beləliklə, Williams təqdimat tarixini açıqlayan ikinci komanda olub. Daha əvvəl Ferrari yeni bolidini fevralın 19-da təqdim edəcəyini bildirmişdi.
Şərh əlavə et