McLaren ilə müqaviləsini 2030-cu ilin sonuna qədər uzatdığını açıqladıqdan sonra Sky Sports-a müsahibə verən britaniyalı sürücü dünya çempionluğunun ona təsirindən danışıb.
Çempion olduqdan sonra necə dəyişdiyi sualına Lando Norris belə cavab verib: “Dəyişməmişəm və açığı, bunun məni və kim olduğumu dəyişməsini də istəmirəm.
Sadəcə dünyada çox az insanın bacardığı bir şeyə nail olmağın verdiyi hisslə həyatımı davam etdirirəm. Uşaq vaxtı qurduğum arzunu gerçəkləşdirdiyimi bilirəm. Bunun nə qədər böyük şans olduğunu və McLaren-in bir parçası olduğum üçün nə qədər imtiyazlı olduğumu dərk edirəm”.
Lando Norris bu mövsüm çempionluq uğrunda mübarizənin yaratdığı təzyiq barədə də danışıb: “İnsanların məndən yüksək gözləntiləri olduğunu bilirəm. Mənim də özümdən gözləntilərim yüksəkdir. Hər şey də məhz buradan başlayır.
Amma bir tərəfdən də mövsümə çox çətin başladıq. Bir çox məsələdə həqiqətən çox bəxtimiz gətirmədi. Mövsümə müəyyən mənfi vəziyyətdə başlayacağımızı bilirdik. Çempionluq uğrunda mübarizə aparmaq o vaxt ağlımızdakı ilk məsələ deyildi. İndi bunun real ehtimala çevrilməsi belə möhtəşəm hissdir.
Əlbəttə, hazırda izləyən tərəf olduğum üçün kifayət qədər rahatam. Amma trasda olduğum hər an bunun məni fərqli hiss etdirdiyini düşünmürəm. Dəbilqəmi hər taxanda yenə də həmin gün qalib gəlmək istəyirəm. Birinci olmaq istəyirəm. Poul mövqeyini istəyirəm. Həmişə sahib olduğum düşüncə tərzi dəyişməyib.
Fərq əsasən boliddən düşəndən sonra özünü göstərir. Lakin bolidin içində olarkən bunun heç nəyi dəyişdirdiyini deyə bilmərəm. Çünki orada olduğum müddətdə həmişə 100 faizimi verirəm. Həmişə son həddə qədər mübarizə aparıram. Özümü pis vəziyyətdə qoymaq istəmirəm. İçində olduğum vəziyyətdən asılı olmayaraq birinci olmaq istəyirəm.
Yəni, bəli, əsas fərq trasdan kənarda daha rahat olmaq və komanda ilə əvvəlkindən də yaxşı işləyə bilməkdir. Bunlar mənə kömək edən amillərdir”.
Şərh əlavə et