Ford-un əfsanəvi modeli Focus üçün pərdə rəsmi şəkildə bağlanıb. 27 ildir Avropa yollarının dəyişməz modellərindən biri olan Focus-un son nümunəsi 14 noyabr, Cümə günü Almaniyanın Saarlouis zavodunda istehsal xəttindən düşüb.
Bu vida əslində Ford-un Avropada uzun müddətdir həyata keçirdiyi genişmiqyaslı model “kiçiltmə” strategiyasının son halqasını təşkil edib. Son illərdə Fiesta və Mondeo kimi markanın ən tanınmış modelləri də bir-bir xəttdən çıxarılıb. Bunun nəticəsində Ford-un Avropa məhsul çeşidi demək olar ki, tamamilə SUV və kommersiya nəqliyyat vasitələrindən ibarət hala gəlib.
Niyə belə oldu?
Ford-un baş direktoru Cim Farli ötən il CAR Magazine-ə verdiyi müsahibədə bu sualın cavabını kifayət qədər açıq ifadə etmişdi. Onun sözlərinə görə, ənənəvi minik avtomobilləri populyar olsalar belə, kifayət qədər mənfəət marjı yaratmırdı. İnvestisiyanın geri dönüşü aşağı qaldığı üçün inkişaf büdcəsini əsaslandırmaq mümkün olmurdu. Farli-nin “Darıxdırıcı avtomobil işindən çıxırıq, ikonik modellərə fokuslanırıq” fikri şirkətin yeni strategiyasını tam şəkildə izah edib.
Lakin bu addımın ciddi nəticəsi də olub. ACEA məlumatlarına əsasən, Ford-un Avropa bazar payı 2015-ci ildəki 7,2 faizdən bu gün 3,3 faizə qədər geriləyib. Focus-un da səhnədən çəkilməsi ilə bu enişin 2026-cı ildə də davam edəcəyi gözlənilir. Çünki Avropada ənənəvi minik avtomobillərinə tələbat hələ də güclü olaraq qalır. Sandero, Golf, Clio, 208, Octavia və Yaris kimi modellər 2025-ci ilin satış siyahılarının zirvəsində yer almağa davam edib.
Ford-un isə yaranan bu boşluğu necə dolduracağı hələ də qeyri-müəyyəndir. Almaniyada diler şəbəkəsinə yeni modellərin yolda olduğu bildirilsə də, ilk modelin böyük ehtimalla Focus ölçülərində bir krossover olacağı deyilib. Yəni marka klassik hetçbek və sedan bazarına qayıtmaq əvəzinə SUV ağırlıqlı strategiyasını davam etdirməyə hazırlaşır. Focus adını gələcəkdə elektrikli bir SUV-da görmə ehtimalımız yüksəkdir.
Şərh əlavə et