Britaniya komandası Formula 1-də zirvəyə oynamaq məqsədilə daha bir vacib addım atıb. Silverstoundakı bazada fəaliyyət göstərən komanda, Ferrari-nin “Şumaxer dövründəki” texniki üstünlüyünün memarlarından biri hesab edilən 61 yaşlı italiyalı mühəndisi heyətinə cəlb edib.
Fainellonun transferi qısa müddət əvvəl Ferrari-dən Aston Martin-ə keçən Enriko Kardilenin birbaşa tövsiyəsi ilə reallaşıb.
Fainello Ferrari-yə 1995-ci ildə qoşulmuş, iki il sonra avtomobil dinamikası şöbəsinin rəhbəri vəzifəsinə yüksəlmiş və Şumaxer dövründə komandanın texniki üstünlüyünə böyük töhfə vermişdi. 2004-cü ildə Ferrari-nin ilk sürüş simulyatorunun yaradılmasına rəhbərlik etmiş, daha sonra Performans İnkişafı Departamentinin başına keçmişdi. Həmçinin Ferrari-nin yol avtomobillərində istifadə olunan Yan Sürüşə Nəzarət Sistemi (SSC) texnologiyasının müəllifi kimi də tanınıb.
Maranellodan 2016-cı ildə ayrılan mühəndis, o vaxtdan bəri irəli mühəndislik və süni intellekt layihələrinə fokuslanıb.
İndi isə Fainello karyerasına yeni istiqamət verərək Aston Martin-in Formula 1 layihəsində mühüm rol oynamağa hazırlaşır. Bu dəyişiklik onun şəxsi həyatına da təsir edib. Belə ki, Qarda gölü sahilində yaşayan italiyalı mühəndis artıq vaxtının daha çox hissəsini Aston Martin Texnologiya Düşərgəsindəki işlərə sərf edəcək.
Adrian Nyuinin 2026-cı il bolidi üzərində çalışdığı bir vaxtda Fainellonun gəlişi, Aston Martin-in Formula 1-də çempionluq uğrunda real rəqabət aparmaq hədəfini bir addım da irəli aparıb.
Şərh əlavə et