Mövsümün ilk altı yarışında Alpine üçün yarışan Duhən, zəif nəticələrə görə yerini itirmişdi. Lakin pərdə arxasındakı məlumatlara görə, komanda rəhbəri Flavio Briatore Kolapintonu bolidə gətirərək, onun sponsorlarını komandaya cəlb etmək istəyib.
Nəticədə bu seçim edilib, amma Argentinalı sürücü gözləniləni qarşılamayıb. Bekə ki, Kolapinto 13 yarışda bir xal belə qazana bilməyib.
The Race nəşrinin məlumatına görə, Alpine həm yay fasiləsindən əvvəl, həm də sonra Duhənə Las Veqas, Qətər və Əbu-Dabi yarışlarında yenidən sükan arxasına keçməyi təklif edib, lakin bu, lazımi maliyyənin təmin olunması şərti ilə olub. Duhən və sponsorları tələb olunan vəsaiti toplasa da, geri dönüş son anda ləğv edilib.
Bu qərarın səbəbi Kolapintonun əsas sponsoru Mercado Libre-nin mövsümün sonuna qədər qüvvədə olan müqaviləsini “pilot dəyişikliyi edilməməsi” şərti ilə yeniləməsi olub.
Bütün bunlara baxmayaraq, Duhən 2026-cı il üçün Alpine komandasındakı yarış oturacağını hədəf kimi görməyə davam edir.
Avstraliyalı pilotun həmçinin Cadillac, Williams, Haas və Sauber komandaları ilə də danışıqlar apardığı bildirilir. Lakin iddialara görə, onun 2026 mövsümündə əsas yarış oturacağı tapması çətin görünür. Ən real ssenari isə hansısa komandada test və ya ehtiyat pilot kimi fəaliyyət göstərməkdir.
Şərh əlavə et