Kokpit.az xatırladır ki, avstraliyalı sürücü Zandfortda keçirilən Niderland Qran Prisində qalib gələrək, mövsümdə 7-ci qələbəsini qazanıb. Lakin komanda üçün uğurlu gün Lando Norrisin texniki problem səbəbindən mübarizəni vaxtından əvvəl dayandırması ilə kölgədə qalıb.
Oskar Piastri (1-ci yer): “Əlbəttə, çox sevincliyəm! Yarışı lazım olan anlarda nəzarətdə saxlaya bildim, amma finişə az qalmış Landonun dayanması təəssüf doğurdu. Tempimi diktə edə bildim və yarış ötən ildəkindən fərqli ssenari üzrə keçdi. Komandamıza görə çox sevinirəm, bu həftəsonunu əla keçirdik.
Xüsusi bir sirrimiz yox idi. Sadəcə hər sahədə təkmilləşməyə çalışdıq. Həftəsonunun əvvəlində çətinliklər gözlənilirdi, amma təsnifatda hər şeyi bir araya gətirdik və bu gün də tempimdən razı qaldım.
Təhlükəsizlik maşınının trasa çıxması yarışa əlavə gərginlik qatdı, amma bütün situasiyalarda güclü idik. Mənim uğurum təkcə mənə aid deyil – bu, bütün komandanın qələbəsidir. Onlarsız belə nəticə mümkün olmazdı.
Pouldan başlamaq böyük üstünlükdür. Əgər bu nəticələri davam etdirə bilsək, əla olar. Ancaq mövsümün sonuna hələ çox var, biz isə hər yarışda maksimum nəticə əldə etməyə çalışacağıq”.
Şərh əlavə et