Kokpit.az xatırladır ki, burada baş tutan hər üç məşqdə Lando Norris birinci olub. Lakin britaniyalı sürücü sıralanma turunda bu üstünlüyünü saxlaya bilməyib və poul yarışında komanda yoldaşı Oskar Piastriyə məğlub olub.
Yarışa birinci cərgədən Piastri və Norris, ikinci cərgədən Ferstappen və Hacar, üçüncü cərgədən isə Rassell və Lekler başlayıblar. Berman isə güc qurğusunun elementlərini dəyişdiyi üçün pit yolundan start alıb.
Pirelli bura orta üçlüyü – C2, C3 və C4 tərkiblərini gətirib. Ferstappen, Tsunoda, Kolapinto və Hülkenberq yumşaq, Berman sərt, qalanlar isə orta təkərlərlə trasa çıxıblar.
Startda Piastri liderliyini qoruyub, Ferstappen isə Norrisi keçib. İlk döngədən sonra Ferstappen idarəetməni bir anlıq itirsə də, maşını ram etməyi bacarıb. Lekler də bir mövqe qazanıb. İkinci dövrədə ilk onluq: Piastri – Ferstappen – Norris – Hacar – Lekler – Rassell – Həmilton – Louson – Sayns – Alonso.
Bortoletonun ön qanadı Strolla mübarizədə zədələnib. Ferstappenin yumşaq təkərləri demək olar ki, işləməyib və Oskardan geri qalmağa başlayıb. Norris ona yaxınlaşıb, 9-cu dövrədə ilk döngədə xarici radiusla ötüb və dərhal uzaqlaşıb. Stroll pit-stop edən ilk sürücü olub.
Leklerin Hacara ardıcıl hücumları nəticəsiz qalıb. Həmilton isə Rassellin DRS məsafəsində ona təzyiqlər etməyə başlayıb. Norris Piastri ilə fərqi azaltmağa başlayıb. Piastri 15-ci dövrədə yağış damcılarının olduğunu bildirib.
Komanda 16-cı dövrədə Kolapintoya Qaslini önə buraxmasını tapşırıb. Bortoleto maşını zədəli olduğu üçün araşdırma altına alınıb. Alonso 19-cu dövrədə təkərlərini dəyişib. Bir dövrə sonra isə Tsunoda təkərlərini dəyişərək Hard-a keçib.
Öndəki sürücülərdən ilk pit-stopu Lekler 23-cü dövrədə edib. Bir neçə saniyə sonra Həmilton üçüncü döngənin çıxışında qəza edib və yarışı dayandırmalı olub. Təhlükəsizlik Maşını trasa daxil olub. Pit-stop etməmiş hamı yeni təkərlərə keçib. TM arxasında ilk onluq: Piastri – Norris – Ferstappen – Hacar – Rassell – Lekler – Louson – Sayns – Okon – Elbon.
TM 26-cı dövrədə trasdan çıxıb və mübarizə davam edib. Saynsın maşınında Lousonla təmasa görə problem yaranıb və hamı onu keçib. Antonelli Okonu da üstələyərək 8-ci yerə qalxıb. Tsunoda Alonsonu geridə qoyub. Sayns və Louson yenidən pit-stop etməli olublar.
Trasda qırıntı çox olduğu üçün 31-ci dövrədə VTM rejimi elan edilib. Lakin qırıntıların götürülməsinə cəmi bir dövrə kifayət edib və restart verilib. Lekler dərhal Rassellə hücum edib və onu ötüb. Lakin Rassell təslim olmaq istəməyib və əks-hücumlara cəhd edib.
Saynsa insidentə görə 10 saniyəlik cəza verilib. Leklerin Rasselli ötməsi yarışdan sonra stüardlar tərəfindən araşdırılacaq. Komandanın istəyi ilə Rassell Antonellini irəli buraxıb. Gənc sürücü Leklerə yaxınlaşmağa başlayıb. Alonso yenə pit-stop edib.
Pit-stop etməmiş Haas sürücülərinin arxasında DRS qatarı yaranıb. Yeni təkərlərə keçən Alonso sürətlə onlara yaxınlaşıb və 51-ci dövrədə Hülkenberqi ötüb. Antonelli 52-ci dövrədə pit-stop edərək qırmızı təkərə keçib. Alonso Bortoletonu da geridə qoyub. Antonellidən az sonra Ferrari Lekleri qırmızı təkərlərə keçiriblər.
Antonelli Leklerə üçüncü döngədə hücum edib və böyük qəzaya səbəb olub – Lekler qəzaya görə mübarizəni dayandırmalı olub. TM trasa daxil olub, hamı dərhal pit-stopa yollanıb. Antonelli də təkərini dəyişərək mübarizəyə qayıdıb.
Stüardlar Antonelliyə 10 saniyə cəza veriblər. Restart 57-ci dövrədə verilib, hamı yerini qoruyub. Ferstappenin Norrisə hücumları nəticəsiz qalıb. Tsunoda isə Bortoletonu geridə qoyub. McLaren sürücüləri sərt təkərlərdə olsalar da, Maksla fərqi dərhal arıtırblar.
Bortoleto 61-ci dövrədə təkərlərini dəyişib. Berman Alonsonu keçib. Antonelli pit yolunda sürət həddini aşdığı üçün daha 5 saniyəlik cəzalanıb. Berman Qaslini də keçərək 8-ci yerə qalxıb.
Alonso Qaslini keçib. Norrisin maşını 65-ci dövrədə tüstülənib və trasda dayanıb. TM dərhal trasa çıxıb. 69-cu dövrədə restart verilib, hamı yerini qoruyub. Piastri dərhal Ferstappendən uzaqlaşmağa çalışıb. Tsunoda Qaslini keçərək ilk onluğa qalxıb.
Kolapinto və Louson da Qaslini keçib. Fransız sürücü Hülkenberq və Saynsdan da geri qalıb. Finişə qədər başqa yerdəyişmə olmayıb.
Beləliklə, Oskar Piastri mövsümdə yeddinci, karyerasında isə 9-cu qələbəsini qazanıb. Komanda yoldaşı yarışı başa vura bilmədiyi üçün avstraliyalı sürücü çempionatdakı üstünlüyünü 34 xala çatdırıb. Maks Ferstappen ikinci olaraq yenidən podiuma qayıdıb. Ayzek Hacar isə karyerasında ilk dəfə podiuma yüksəlib və F1 tarixində bunu bacaran 219-cu sürücü olub.
Mübarizə gələn həftə İtaliyada davam edəcək…
Şərh əlavə et