Zandfortda ikinci sessiya zamanı hava şəraiti buludlu və quru olub. Havanın temperaturu 20-21 dərəcə, asfaltın temperaturu isə 28-29 dərəcə olub. Sessiyanın əvvəlində radar 14 dəqiqəyə yağış gözlədiyini göstərsə də, yağış demək olar ki, dərhal başlatıb və eyni anda bitib. Bununla da asfalt islanmayıb.
Sessiya ərzində isə bu hadisələr baş verib:
• Ləns Stroll üçüncü döngədə təkərləri bloklayaraq, idarəetməni itirib və bariyerlərə girib. Sessiya qırmızı bayraqla dayandırılıb. Strollun vəziyyəti yaxşı olsa da, təhlükəli yüklənmə sensoru işə düşdüyü üçün tibbi mərkəzə aparılıb.
• Qəza zamanı Stroll sükan arxasında əllərini vaxtında çəkə bilməyib. İki il əvvəl oxşar hadisə Daniel Rikkardonun əl sınığı ilə nəticələnmişdi, amma bu dəfə hadisə ciddi zədəsiz ötüşüb. Maşın evakuasiya olunub, trasdakı yağ və qalıqlar təmizlənib.
• Ayzek Hadjar güc qurğusunda problem yaşayaraq sessiyanı vaxtından əvvəl dayandırıb və sürətli dövrə vura bilməyib.
• Lyuis Həmilton sürətli dövrədə maşının idarəetməsini itirib və yerində fırlanıb, amma maşına ziyan dəyməyib. Lakin təkər dəsti sıradan çıxıb.
• Aleks Elbon birinci döngədə əyləcləri bloklayaraq, çınqıllı zonaya çıxıb və bariyerə çırpılıb. Williams evakuasiya olunub Elbon piyada şəkildə boksa qayıdıb. Bununla da onun üçün sessiya bitib. Bu qəza da qırmızı bayrağa səbəb olub.
• Qırmızı bayraq zamanı boks yolunda Corc Rassell ilə Oskar Piastri arasında kiçik təmas yaşanıb. Belə ki, Piastri pitə dönmək üçün manevr edəndə Rassell ona toxunub.
Son 15 dəqiqə isə problemsiz keçib. Ən yaxşı nəticəni Lando Norris göstərib – 1:09.890. Onu 0.087 saniyə fərqlə Fernando Alonso izləyib. Çempionatın lideri Oskar Piastri isə üçüncü olub.
Şərh əlavə et