Kokpit.az xatırladır ki, britaniyalı sürücü bu mövsüm Ferrari-yə transfer olunsa da, yeni komandasında hələ də podiuma yüksələ bilməyib.
Lyuis Həmilton: “Ötən həftə mənim üçün düşünmək və dəyərləndirmək üçün yaxşı fürsət oldu. Nələri yaxşılaşdırmaq, nələri dəyişmək istədiyimizi təhlil etdim. Kənardan elə görünməsə də, mövsümün ilk yarısı kifayət qədər pozitiv keçdi. Əldə etdiyimiz inkişafı davam etdirmək lazımdır.
Qələbələr heç vaxt öz-özünə gəlmir, çətinliklər həmişə olur. Mən isə dayanmağı sevmirəm. Düşünürəm ki, biz böyük irəliləyiş etmişik və düzgün istiqamətdə gedirik. Spadan sonra gətirilən yeniliklərə yavaş-yavaş uyğunlaşırıq və hər yarışda onlardan daha çox faydalanırıq. Ümid edirəm ki, bu həftəsonu daha bir addım irəli atacağıq.
Hazırda mənim içimdə çox böyük motivasiya və qərarlılıq var. Mövsümün ilk yarısı təzyiq baxımından kifayət qədər çətin idi, bəzən işdən zövq almağı belə unudurduq. Amma biz bu idmana sevgi ilə gəlmişik və əsas odur ki, bundan həzz ala bilək.
Ferrari mənim həmişə arzusunda olduğum komanda idi. Bura gəlmək möhtəşəm hissdir, amma eyni zamanda çox böyük komanda və idmanın ən güclü brendidir. Yeni ortaqlar, reklam çəkilişləri, adaptasiya prosesi — bütün bunların hamısı kifayət qədər çətin oldu. Burada incə bir balans var: sürücü komandanın metodlarına uyğunlaşmalıdır, yoxsa komanda sürücüyə? Mən bu mövsüm əsasən onların iş üslubuna uyğunlaşmağa çalışdım, sonra isə öz təcrübəmlə necə daha yaxşı ola biləcəyimizi anlamağa cəhd etdim.
Əminəm ki, birlikdə çox şeyə nail ola bilərik. Uğur heç vaxt asanlıqla gəlmir, amma mən daha parlaq günləri səbirsizliklə gözləyirəm.
Montsada hansı nəticə qazanacağımız barədə isə düşünməmişəm. Mən bir günlə yaşamağa çalışıram. İmolada azarkeşlərin dəstəyi inanılmaz idi, Montsada da eyni atmosferi görməyi səbirsizliklə gözləyirəm”.
Şərh əlavə et