Britaniyalı mühəndis bildirib ki, performans hələ də əsasən təkərlərlə məhdudlaşacaq və güc qurğusunun əhəmiyyəti şassi və aerodinamikadan sonra ikinci dərəcəli faktor olacaq.
Ceyms Əllison: “Bəzi şeylər daha yaxşı olacaq. Düzlüklərin sonunda çox yüksək mühərrik yükləri kimi mənfi hallar aradan qalxacaq. Artıq düzlüklərin sonunda daha balanslı yüklənmə olacaq və bu da hər kəs üçün faydalıdır”.
2026-cı ildən etibarən Formula 1-də böyük dəyişikliklər qüvvəyə minəcək. Güc vahidində daxiliyanma mühərriki ilə elektrik mühərriki 50/50 nisbətində güc paylayacaq. Bundan əlavə, aktiv aerodinamika sistemi sayəsində ön və arxa qanadlarda hərəkətli elementlər bolidlərin aşağı sürtünmə və yüksək asfaltayatma qüvvəsi rejimləri arasında keçid etməsinə imkan verəcək.
Əllison bunların arasında ən çətin tapşırığın şassi və aerodinamikanı idarə etmək olduğunu desə də, əsas məhdudiyyətin yenə də təkərlər olacağını vurğulayıb: “Daha kiçik təkərlər sürtünməni azaldacaq, amma bu, eyni zamanda təkərlərin daha çox işləməsi deməkdir. Üstəlik, təkər isidicilərinin ləğvi də əlavə çətinlik yaradacaq. Qaydalar tələb edir ki, artıq çox aşağı temperaturda, isidicilərsiz işləyək. Bu halda Pirelli elə tərkib hazırlamalıdır ki, mövcud təkərlərdən fərqli olaraq daha soyuq şəraitdə də performans göstərə bilsin”.
Əllison sözlərini belə yekunlaşdırıb: “Bəzi aspektlərdə inkişaf olacaq, amma gələn il də təkərlər bu il olduğu qədər kritik olacaq”.
Şərh əlavə et