Kokpit.az xatırladır ki, argentinalı sürücü mövsümün yeddinci mərhələsində Cek Duhəni əvəz etmişdi. O, beşyarışlıq müqavilə bağlamışdı və Avstriya yarışı əslində onun üçün sonuncu yarış olmalı idi. Kolapintonun bu beş yarışda ən yüksək sıralanma nəticəsi 10-cu yer, ən yüksək yarış nəticəsi 13-cü yer olub. Cek Duhənin də statistikaları argentinalı ilə oxşardır – ən yaxşı sıralanma nəticəsi – 11-ci yer, ən yaxşı yarış nəticəsi 13-cü yer.
Kolapintonun Formula 1-dəki debütü keçən ilin İtaliya Qran Prisində Williams komandası ilə reallaşmış və gənc sürücü o yarışdan xalla ayrılmışdı. Cek Duhən isə Formula 1-də 2026-cı ildə debüt edib.
Franko Kolapinto Silverstounda keçiriləcək yarış barədə bunları deyib: “Keçən il Silverstounda birinci sərbəst yürüşlərdə trasa çıxaraq, ilk dəfə Formula 1 bolidi sürmək təcrübəsi yaşamışdım. Buna görə də Britaniya Qran Prisini səbirsizliklə gözləyirəm.
Bu tras komandanın bazasına yaxın olduğu üçün bazaya gedib mühəndislərlə vaxt keçirdim. Bizim üçün vacib olan hər yarışa bir-bir köklənib, hər həftəsonu inkişaf etməkdir”.
Qeyd edək ki, Franko Kolapinto bu həftəsonu Silverstounda Formula 1 karyerasının 15-ci Qran Prisinə çıxacaq. Bundan sonra bizi üçhəftəlik fasikə gözləyir. Bu müddətdə Alpine komandası Kolapinto ilə bağlı qərarını verəcək.
Şərh əlavə et