Rəsmi: 2026-cı il təqvimi açıqlanıb

8 martda Melburnda keçiriləcək ilk yarışdan sonra sürücülər Çinə gedəcəklər. Bu iki yarış ardıcıl iki həftədə baş tutacaq.

2026-cı il təqvimində may ayında böyük dəyişikliklər var. Daha əvvəl bildirildiyi kimi Kanada Qran Prisi loqistika uyğunluğu üçün əvvələ çəkilib. Ancaq iki yarış arasında 3 həftə fərq olacaq. Kanada Qran Prisi bu dəfə iyun ayında yox, mayın 24-ü təşkil ediləcək və İndi500 ilə üst-üstə düşəcək. İki yarış arasındakı bu məsafənin əsas səbəbi isə Emiliya Romanya Qran Prisinin təqvimdən çıxarılmasıdır.

Monako Qran Prisi isə bu dəfə may ayında yox, iyun ayının ilk həftəsində təşkil ediləcək. Monakodan sonra isə adı hələ açıqlanmayan Barselona ayrışı keçiriləcək. Düzdür, Barselona trası hazırda İspaniya Qran Prisi adını Madridə versə də, müqaviləyə əsasən daha bir il təqvimdə qalacaq.

Yay tətilinə qədər olan proqramda daha dəyişiklik olmayacaq və sürücülər iyul ayının sonunda keçiriləcək Macarıstan Qran Prisindən sonra tətilə gedəcəklər.

Sürücülər tətildən Niderland Qran Prisi ilə qayıdacaqlar. Daha sonra İtaliya və Madriddə İspaniya Qran Priləri təşkil ediləcək. Lakin Madriddəki yarışın yeri hələ tam dəqiq deyil və trasın təsdiqlənməsi lazımdır.

Madriddən iki həftə sonra isə Formula 1 Dünyasının nəzəri paytaxtımıza – Bakı Şəhər Halqasına – yönlənəcək. Belə ki, mövsümün 17-ci mərhələsi olan Azərbaycan Qran Prisi 25-27 sentyabrda keçiriləcək.

2026-cı il mövsümü 2024-cü ildə olduğu kimi 7 həftədə 6 yarışla bitəcək. Bu dövr ərzində Amerika qitəsində Ostin, Meksika və Braziliya Qran Prilərini Las Veqas, Qətər və Əbu Dabi Qran Priləri izləyəcək.

2026-cı il mövsümündə 6  sprint yarışının olması planlaşdırılır. Bundan başqa komandaların və motor istehsalçılarının yeni reqlamentə uyğunlaşa bilməsi üçün iki trasda – Barselona və Bəhreyndə üçgünlük qış testləri keçiriləcək.