Kokpit.az bildirir ki, britaniyalı sürücünün Ferrari ilə ilk testi tiffozinin böyük marağına səbəb olub. O, Pirelli-nin yağış və şou təkərləri ilə Fyorano trasına çıxıb və bəzi döngələrdə yaşadığı kilitlənmələri nəzərə almasaq, yaxşı gün keçirərək, komandaya tez uyğunlaşıb.
Lyuis Həmilton: “Karyeram ərzində çoxlu ilklər oldu. İlk test, ilk yarış, ilk podium, ilk qələbə, ilk çempionluq, ancaq ilk dəfə Ferrari bolidini sürmək həyatımın ən gözəl hisslərindən biri idi. Maşını işə salıb boksdan çıxdığım anda üzümdə gülümsəmə əmələ gəldi. Mənə ilk Formula 1 testimi xatırlatdı. O həyəcan və xüsusi hisslər geri qayıtdı. İyirmi ildən sonra eyni hissləri yaşamaq inanılmaz idi.
Ferrari ailəsinin necə istəkli olduğunu əvvəllər də bilirdim, amma bunu Ferrari pilotu kimi təcrübədən keçirmək çox ilhamvericidir. Bu istək onların damarlarından axır və sizə enerji verir. Bu həftə Maranelloda onların sevgisini gördüm və buna görə minnətdaram. Önümüzdə görəcək çox işimiz var, ancaq başlamaq üçün səbirsizlənirəm”.
Nahardan sonra sükan arxasına Şarl Lekler keçib və o, 14 dövrə vuraraq, 2025-ci il mövsümünə başlayıb.
Testə Ferrari-nin vitse-prezidentin Pyero Ferrari nəzarət edib. Bundan başqa Lyuis Həmiltonun anası da xüsusi anı izləmək üçün Fyoranoya gəlib.
Şərh əlavə et