Mövsümün son mərhələsi olan Barselona Qran Prisində çempion məlum olacaq. Son yarışa Pramac Ducati komandasının sürücüsü Xorxe Martin əsas rəqibi Françesko Banyayadan 24 xal öndə başlayır. Yəni ki, bu gün sprint yarışını Martin qazansa, karyerasının ilk Dünya Çempionluğunu elan edəcək. O, həm də MotoGP tarixində peyk komandası ilə çempionluq yaşayan ilk sürücü olacaq.
Barselona Qran Prisinin birinci sərbəst yürüşlərində Takaqi Nakaqami hamıdan sürətli olub. Françesko Banyaya əsas sərbəst yürüşlərdə birinci yeri tutub. Bu gün keçirilən ikinci sərbəst yürüşlərdə isə ən sürətli Maverik Vinyales olub.
Sıralanma turunda isə Françesko Banyaya poulu əldə edib. Aleş Esparqaro ikinci, Mark Markes üçüncü yeri tutub. Çempionatın lideri Xorxe Martin isə yarışa dördüncü yerdən start verəcək.
Yarışın startında Xorxe Martin yaxşı start alıb. Lakin birinci döngədən sonra Banyaya ilə Bastyanininin gerisində qalıb. İlk dövrədə Mark Markeslə Pedro Akosta təmas ediblər. Nəticədə Akostanın ön qanadı qopub və mübarizəni dayandırıb. Markes yeddinci yerə geriləyib.
Yarışın üçüncü dövrəsində Martin düzlükdə Bastyanini geridə qoyub və ikinci yerə yüksəlib. Lakin bir dövrə sonra eyni yerdə italyan sürücü yerini qaytarıb. Beşinci dövrədə Martin yenidən Bestiyaya hücum edərək, ikinci yerə yüksəlib.
Səkkiz dövrədən sonra sıralanma belə olub: Banyaya, Martin, Bastyanini, Aleks Markes, Esparqaro, Morbidelli, Mark Markes, Kuartararo, Bezzekki
Yarışın son dövrəsində Aleş Esparqaro Aleks Markesi keçib. Son dövrənin beşinci döngəsində isə Enea Bastyanini təmiz hücumla Xorxe Martini geridə qoyub və ikinci yerə yüksəlib.
Beləliklə, Françesko Banyaya mövsümün son sprint yarışını qazanaraq, mövsümdə 7-ci sprint qələbəsini əldə edib. Enea Bastyanini ikinci, Xorxe Martin üçüncü olub. Bununla da Banyaya sabahkı əsas yarışdan əvvəl Xorxe Martinlə xal fərqini 19-a salıb.
Şərh əlavə et