Kokpit.az bildirir ki, almaniyalı mütəxəssis yeni fürsətlər üçün vəzifəsindən gedib.
Beynəlxalq Avtomobil Federasiyası (FİA) bu barədə belə açıqlama verib: “FİA bildirir ki, Nils Vittix yeni fürsətlərin dalınca getmək üçün Formula 1 Yarış Direktorluğu vəzifəsindən ayrılır. Nils yarış direktoru kimi üzərinə götürdüyü çoxlu məsulliyəti peşəkarlıqla yerinə yetirib. Ona bu işlərinə görə təşəkkür edirik və gələcək üçün uğurlar arzulayırıq”.
Son iki ildə Formula 2 və Formula 3-də yarış direktoru kimi işləmiş portuqaliyalı Rui Markes Las Veqas Qran Prisindən etibarən Nils Vittixi əvəz edəcək.
FİA verdiyi açıqlamada bunları bildirib: “Rui Markes Las Veqas Qran Prisindən etibarən Yarış Direktorluğu vəzifəsinə keçəcək. Rui daha əvvəl müxtəlif çempionatlarda marşal, nəzarətçi, yerli və beynəlxalq hakim, Yarış Direktoru Köməkçisi və Yarış Direktoru kimi işləyib. Son olaraq Formula 2 və Formula 3-də Yarış Direktoru vəzifəsini icra edib”.
Xatırladaq ki, Nils Vittix 2021-ci ilin Əbu Dabi Qran Prisindən sonra Maykl Masinin əvəzinə vəzifəyə gəlmişdi. O, əvvəl bu vəzifəni FİA WEC yarış direktoru Eduardo Freytas ilə bölüşsə də, daha sonra bu vəzifədə tam zamanlı olaraq işləməyə başlamışdı. 52 yaşlı Vittix daha əvvəl Almaniyada DTM Seriyasının yarış direktoru kimi işləmişdi.
Şərh əlavə et