Kokpit.az xatırladır ki, Lyuis Həmilton gələn il Ferrari komandasında Karlos Saynsı əvəz edəcək. Lakin onun 40 yaşında Mercedes-dən ayrılıb, “qırmızılar”ın heyətinə qatılması bəzi söz-söhbətlərə səbəb olub. Əksəriyyət düşünür ki, yeddiqat Dünya Çempionu Ferrari komandasına komfort zona üçün gəlib.
Lakin GP2 və F3 Euro Seriyasında Həmiltonla işləmiş Frederik Vassyör bildirib ki, britaniyalı pilot həmişə Ferrari-də yarışmağı xəyal edib və o əlavə edib ki, Lyuisin Mercedes-dən ayrılıb Ferrari-yə keçməsi komandanın doğru yolda olduğunu göstərir.
Frederik Vassyör: “Lyuisi razı salmaq o qədər də çətin olmadı. 2004-cü ildən bir yerdə işləmişik. O vaxt McLaren Mercedes komandasında olsa da, vaxtı gələndə Ferrari-də yarışmaq istəyirdi.
Bir müddət əvvəl bu barədə danışdıq. Bu istəyi həmişə ağlında idi. Ancaq o komandanın performansı barədə təminat istəyən sürücüdür. Buna görə də həmişə zirvədədir. Əgər o, Ferrari-ni seçibsə, deməli bizim maşınımız yaxşı olacaq.
Lyuis kimi sürücü tətil üçün bizim komandaya gəlməz və düşünürəm ki, performans cəhətdən düzgün yoldayıq. İrəliyə doğru addım atmalıyıq və onu da deyim ki, növbəti layihəmiz üçün çoxlu resurs ayırmışıq”.
Şərh əlavə et